› 選擇地區
三藩市
紐約
洛杉磯
其他美國地區
香港 台灣 北美
 
2015年09月02日

放假讀物 - 左丁山

去旅行,坐飛機、坐火車,往往需要幾個鐘頭,如何打發時間?左丁山以前懶醒,往往帶一兩本歷史書,一本詩集之類上路,但次次讀讀吓書就眼皮下垂,冇法子集中。今次索性唔帶書,帶咗幾本「經濟學人」雜誌,一叠「金融時報」長篇文章,以為可以睇得完,點知結果還是一樣,大概係旅行時,腦袋已經放鬆咗,幾難吸收消化一啲硬性、理性化嘅理論或市場大勢。放假就是放假,嚴肅思考也隨之而去,坐在福岡海濱曬太陽之時,閱讀文章分析中國經濟是否可以保七,或聯儲局會不會在九月加息,實在大煞風景。
最後還是聽從太太意見,在書局買了一本流行小說,看到書架上有名作家John Grisham嘅2014年新版小說Gray Mountain,咪隨手就拎去櫃枱俾錢囉。呢位律師作家成名多年,湯告魯士係靚仔,不是靚佬之時拍攝嘅電影The Firm就係Grisham嘅暢銷書改編,小說好睇,電影亦好睇。流行暢銷小說作家有嘅本事就係寫得吸引,一開始睇幾頁,就難放低本書,而且奇怪嘅係,愈睇愈精神,極少睇睇吓就瞓着嘅。於是乎,呢本Gray Mountain就陪住左丁山搭火車及晚飯後坐在酒店房間,加埋回港候機、乘機時間,啱啱睇完。
老實講,呢本書並冇同一作者暢銷小說咁奇情刺激,中間仲有啲沉悶,但美國暢銷作家勝在有錢有資源,搜集資料做到十足十,對普通讀者嚟講,甚有教育性,例如呢本書講女主角出身中產以上家庭,父母皆為律師,女主角順理成章讀完George Town就入讀Columbia Law,跟住進入世界最大律師行做Associate。做咗4年,29歲就有年薪18萬美元,期望35歲可晉升為Junior Partner,年薪50萬美元再加花紅,以後一世無憂!點知在2008年碰上金融海嘯,雷曼破產,女主角所屬嘅地產部一向倚賴雷曼向客戶融資,於是瓜晒,成個部門炒魷,律師失業,律師行安排佢地去非牟利義工組織做臨時「無糧律師」一年,一年後再睇形勢。如此這般,女主角就去到西維珍尼亞煤礦山區一個法律援助機構「為人民服務」,人生第一次領略華盛頓、紐約以外嘅真實世界,遇上離婚、家暴、煤礦工人患上「黑肺」、煤礦公司謀殺山區樹林環境生態……令呢個做咗4年律師還未上過法庭嘅年青女律師大吃一驚,被迫走入社區「挽救世界」。佢想過逃回紐約做嬌嬌女過繁華生活,但當時律師大量失業噃,點樣先至好?入讀本地大學讀法律系嘅尖子學生,不妨一讀呢本小說。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載