› 選擇地區
三藩市
紐約
洛杉磯
其他美國地區
香港 台灣 北美
 
2015年09月16日

人民幣匯價 - 左丁山

李克強堅持人民幣沒有持續貶值的基礎,中國不會用貶值策略來刺激出口。講完之後(九月十日),人民幣即刻強勢上升,你話中國總理係唔係好有料先。
經濟師L就話唔係,只係暫時性反彈啫。1997年英鎊正式貶值前數小時,英國財相拉蒙特仍然大大聲講英鎊不會貶值㗎。中國領導人會唔會腰骨咁輕呀?好難講,經濟師L話人民銀行行長周小川及李克強以前真的是說了算數,但自從人民幣匯價中間值突然下調之後,佢地嘅諾言與西方政客已經係等量齊觀。
客觀上中國確係有貶值需要。睇中國PMI、PPI,已經連續下跌近一年,出口進口持續不振,外匯儲備一年來少了940億美元,在在顯示有走資情況,如中國係完全由市場主導,人民幣早與日元、紐元、澳元看齊,至少同步下滑。
但國際間──特別係歐美政治上還是要人民幣升值,至少不貶值,中國政府似乎默默承受呢種壓力。純講理論,中國要在資本賬開放,人民幣匯率與貨幣政策獨立性以上三者之中,選擇兩項,經濟理論叫做Impossible Trinity。香港因選擇咗聯繫匯率不動如山,已經放棄了貨幣政策獨立性、維持資本賬開放,資金自由進出。中國係堂堂大國,單是為了面子,斷不會放棄貨幣政策獨立性,也因為中國經濟係有社會主義特色,政府鍾意控制,資本賬暫難開放,故此只可能放棄控制匯率,讓匯率在市場浮動。咁講法人民銀行可唔可以不斷在市場干預,沽美元買人民幣以阻止人民幣貶值呀?答案在歷史裏,從未有過中央銀行可以長期阻擋市場大勢。從實務講,富二代廠家W在中國管理勞動力密集工廠已有三十餘年經驗,佢話三十年來中國民工工資不斷上升,現已貴過羅馬尼亞工人,遠超緬甸、柬埔寨工人,加上廠房地皮價已上升不少,人民幣十年來不斷升值,最攞命嘅,中國勞工稅務加加埋埋有35種稅,管理上極其麻煩,故此好多廠商已經外遷,如人民幣不貶值嘅話,中國輕工業已失去世界競爭力。李總理所言,對於商品出口無幫助,李總理係唔係講資本密集,知識密集嘅高科技工業呀?可能係嘅;但中國有億億聲工人要餵飽,要做工,高科技工業未必對嘴形啫。綜合理論與實務,人民幣最終還是不貶值還須貶值。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載