› 選擇地區
三藩市
紐約
洛杉磯
其他美國地區
香港 台灣 北美
 
2015年09月27日

電台電影 - 左丁山

鳳凰衛視附屬公司將數碼廣播牌照交還俾政府,負責監管電視電台嘅商務及經濟發展局局長蘇錦樑話目前毋須發出新數碼廣播牌照。創辦數碼廣播公司(DBC)嘅鄭經翰唔怕以前幾乎輸到入肉嘅經驗,聲言話要申請番一條頻道,相信蘇局長唔敢批准嘅。
數碼廣播非常難做,攞咗牌嘅DBC(投資最大,動作最多),新城,鳳凰各有苦水。鳳凰搞唔掂,索性劈炮,新城穩紮穩打,又有FM台嘅收益照住,默默耕耘,但黃楚標向鄭經翰買入DBC全部股權之後,擺大個頭,搵李國章做董事會主席,李少光做董事,大灑金錢仍然得唔到政府祝福,咁至㷫過火炭。本來歐洲新車已內置數碼電台,但政府話數碼電台附設顯示屏,於例不合,要汽車在入口前除掉數碼電台功能,咁即係倒瀉數碼電台(DBC與新城)嘅飯碗啫,要知道,目前香港有相當大嘅比例電台聽眾係駕車人士與的士司機吖嗎,如云於例不合,咁電動車Tesla有大屏幕,不少的士佬上GPS及擺放五六個手機,又唔見運輸署禁止?當初政府以追上數碼化,追上世界潮流為名,鼓勵業者競投,收取高昂牌照費,收到錢之後就諸事不理,連幫助數碼廣播擴大覆蓋率都愛理不理,害埋公營香港電台,實在係一種誤導投資者嘅明呃行為。依家話搞創新科技局喎,如果真係成立,鼓勵創新投資,商家還是小心啲至好,政府官員隨時講完就算交咗差,信者得死㗎。
近日又有宣傳話中美合資旗艦影業在港設總部,新華社講到係習近平訪美之前的新進展,梁振英更加領功,話有份促成其事。電影公司在港設總部,香港究竟有乜得益,是否香港啲編劇家導演演員茄喱啡從此有好多工做?搵鬼信咩,華納兄弟不外乎利用中美合資之名,在大陸拍電影,迎合大陸市場而已,對香港電影從業員之就業幾難有大貢獻,左丁山就唔信呢間中美合資電影公司以後拍片會以香港為大本營。啱啱前幾日與鄭經翰食午飯,大班話溫哥華現在係荷里活拍電影基地,原因係溫哥華市政府提供大量金錢津貼送俾美國公司,等佢地在溫哥華拍戲請多啲加拿大工人,換句話講,溫哥華納稅人出近乎40%嘅工人薪水,先至可以提高電影工業就業率。如果梁政府用呢招吸引美國電影公司,在香港拍電影,左丁山梗係反對啦,有乜理由我地香港納稅人要津貼荷里活大亨啫,唔好開玩笑。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載