› 選擇地區
三藩市
紐約
洛杉磯
其他美國地區
香港 台灣 北美
 
2015年10月04日

冒充李嘉誠為文 - 左丁山

舊年佔中之時,互聯網上出現李純恩、沈祖堯、李嘉誠嘅文章,一睇就知道係假嘅,李純恩、沈祖堯(透過中大)都曾發表聲明否認,至於李嘉誠,因為聲名太響,樹大招風,不願多言,明白道理嘅人,自然知道某些搖筆份子,為了某些目的,專業在網上造假。
近日網上及WhatsApp又出現一篇長達三頁A4紙嘅李嘉誠自白書,左丁山一收到WhatsApp,就向羣組說明:「假冒之作,不可相信。」點解咁肯定?李先生何來咁多時間對無聊無理指稱一一澄清吖。呢篇假文本可不理,但日前又收到老友披圖傳來,跟住又見到著名亞視編劇家梁立人在信報(九月二十九日)引述假文最後一段,先知道社會上可能真係有人相信假文是真貨。老實講,嗰啲冒充李嘉誠、沈祖堯、李純恩文字為文之人,文筆確係唔錯,寫文流暢動人,咁就令人嘆息,君既有才,何必自殘,有嘢咪出真姓名去寫文囉。
李嘉誠對投資時機之精確掌握,香港富豪無出其右,成為亞洲首富,確有貨真價實嘅條件。內地媒體發表文章批評李嘉誠自大陸「撤資」,第一篇係新華社旗下嘅瞭望智庫微信公眾號:「別讓李嘉誠跑了」,最初左丁山亦以為係官方意見,後來(九月二十三日)蘋果財經版專欄作家周顯清楚指出,該文作者羅天昊原來係寫「怪論」嘅,以前寫過「中國應開徵美女稅」,「中國應引進一億亞非青年」,「中國應勸朝鮮主動割讓出海口」等文章,方知係空想份子議論,不值一談。新華社搞智庫,任由評論員發表亂噏文章,可算反智到極。
投資這回事,與感情不可扯上關係,投資係為了賺錢,不是做善事,係完全百分之一百嘅理性行為,要把握時機進退。華爾街日報在九月初有報導指李嘉誠係投資天才,2011年起出售內地投資套現,2012年後未曾在中國內地買入,咁做不是不愛國,而係照顧到股東利益,為股東設想。講感情就係做善事,李嘉誠創辦「李嘉誠基金」,至今捐出港幣170億元,絕大部份係用諸於中國大陸,以後仍然會捐。李嘉誠其實係自香港及海外發大財之後,先至同其他香港工商界人士一樣,到大陸投資,幫助在開放初期缺乏資金嘅中國經濟撻着引擎起動,例如今天深圳若無80年代港商投資,何來起飛動力?今日內地人財大氣粗,香港商人吼準時機套現若干資金,十分合理。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載