› 選擇地區
三藩市
紐約
洛杉磯
其他美國地區
香港 台灣 北美
 
2015年10月16日

TPP(一) - 左丁山

十月十日沙田賽馬,在廂房內碰到幾位工業界的富二代、富三代,雖說是第二代,但年紀已在60歲上下,因香港戰後第一代白手興家的工業家,仍然在世的,個個有八九十歲,現在嘅生意當然係由60歲左右嘅仔以及30歲左右嘅男孫女孫繼承並主持大局。呢兩代工業家有個特點,就係全部留學英美,第三代工業家更係講英文好過中文,對紐約倫敦認識多過北京上海,佢地對中國國情就要惡補,但對世界經濟大勢之掌握,就叻過阿爺嗰代噃。
於是乎講馬之餘,都講埋TPP。TPP雖然只係簽咗大原則協議啫,細節仍待琢磨,要在各簽約國通過晒,仲要等多兩三年,但香港廠家已經要周圍打聽,準備對策咯。呢個TPP全名叫做The Trans-Pacific Partnership,中文譯做「跨太平洋戰略經濟夥伴協定」,本來英文冇「戰略經濟」呢個詞嘅噃,點解中文要加上去呢?左丁山唔識,總之叫做TPP就算。TPP在2015年十月五日上午九時二十二分在美國阿特蘭大市,由美國貿易代表賈羅曼與另外11國代表宣佈達成協議,結束咗長達五年半嘅談判。12個簽署國就係美洲五國:美國、加拿大、智利、墨西哥、秘魯;亞太國家7個:日本、澳洲、紐西蘭、馬來西亞、新加坡、汶萊、越南。TPP協議之主要大原則係取消所有產品入口關稅(當然係逐步取消),加強保護勞工權益,加強對藥物專營權的保護,加強對國有企業的管制,及開放服務行業。
TPP冇中國參加,主要係美國一開始就講到明,要由美國寫下21世紀世界貿易規則,中國早早知道,都費事參與談判。TPP協議簽訂後,美國總統奧巴馬發表聲明,直情話:「When 95% of our potential customers live outside our borders, we can't let countries like China write the rules of the global economy. We should write those rules.」(我們的九成半潛在客人居於境外,我們不能讓中國一類國家訂下環球經濟的規則。我們應該寫下規則。)即係話,TPP有明顯針對中國的特性,中國要加入時就要遵從TPP訂下嘅規矩辦事!唔鍾意呀,中國咪自己在門外諗辦法囉。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載