› 選擇地區
三藩市
紐約
洛杉磯
其他美國地區
香港 台灣 北美
 
2015年10月27日

委內瑞拉 - 左丁山

國際油價在每桶50美元以下浮沉,令石油生產國遇上財政困難,即使文明如挪威,老早已設立石油基金(後改稱為挪威國民長俸基金),為北海油田乾涸之日作準備,但點都諗唔到石油價會由2014年六月時嘅接近150美元一桶,跌足一年,唔見咗一百美元,所以挪威政府都要開始節流,其他大花筒國家更加唔駛講。蘋果日報十月二十日B4版有一個表,列出委內瑞拉公共財政收支平衡嘅話,油價要高達117.5美元,而負債佔GDP嘅57.3%。睇呢個數字,委內瑞拉遲早唔掂,或者需要俄羅斯打救,但俄羅斯亦係靠石油天然氣,點有餘力幫助窮細佬呀,可能最後嘅救主就係習大大,動用中國外匯儲備頂住呢個反美社會主義國家,買下一個拉丁美洲反美或抗美盟友。
前委內瑞拉總統查韋斯反美成狂,崇拜卡斯特羅,將石油產業國有化,趕走美國佬,對內就大派社會福利買選票,鞏固權力後就鎮壓反對佢嘅新聞媒體,因患癌症死咗之後,繼承人馬杜羅總統沿用佢嘅政策,以為石油錢長使長有,點知美國佬大事投資頁岩氣(shale gas),令美國成為能源出口國,油價於是大跌,委內瑞拉咁就瓜得。委內瑞拉依家幣值大跌,每bolivar在黑市市值大跌,每700 bol先至兌到一美元,委內瑞拉人於是瘋狂積存美金,委內瑞拉政府十幾年來反美,行社會福利主義,得到如此下場,可云慘矣,難得以前香港還有左傾記者大讚委內瑞拉有硬骨頭反美㖭。
紐約時報(十月二十日)新聞,講及一位委內瑞拉工程師被匪徒搶車打劫,匪徒有長槍有手榴彈,竟然唔要工程師嘅本國貨幣,又唔逼佢去銀行攞錢,而係問佢:「你屋企係唔係收埋一啲美元?」匪徒搶錢都要搶美金,唔要bolivar,總統知道都應該覺得醜怪,所以幾個月來,委內瑞拉政府都唔肯公佈一啲經濟數據,例如通脹,一加侖白漆油喺星期四賣6000 bol,到咗下一個星期五,要賣12000 bol,通脹率根本冇得計。委內瑞拉故事教訓世人,一個冇新聞自由嘅民選社會主義政府,極其危險,只有在受過長期文明薰陶尊重人權嘅文明國家如北歐三國,行社會福利主義及高稅政策才有成功希望。左丁山支持自由民主選舉,但對一啲猛講派糖,影響企業賣廣告,及信奉政府干預之人,一定唔會投佢一票。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載