› 選擇地區
三藩市
紐約
洛杉磯
其他美國地區
香港 台灣 北美
 
2015年10月29日

美酒佳餚節 - 左丁山

陸羽茶室兩個月前已在牆上貼出告示,指因酒牌未續,暫停售酒。點知兩個月過咗咯,上星期五仍然未獲發牌,因此食客唯有自己帶備紅酒,陸羽代開瓶,不收開瓶費。
以陸羽有七十幾年歷史,素來有酒牌,續牌唔係好易嘅咩?餐飲M話近兩年見到啲公僕做事手腳慢咗,去年連馬會都未能及時續牌,搞到馬會有個幾月不能在會所餐廳內賣酒,公僕一於執正執到加零一,理得你係尊貴會所還是經典名牌老店。其他酒家酒吧要續牌,非要打醒精神,提早提前搞酒牌續約不可。
由10月22日下午八時起至10月25日晚上閉幕為止,中環海濱嘅美酒佳餚節真係人山人海,擠到水洩不通,今年天公造美,冇落雨,戶外活動就有睇頭。餐廳R嘅葡萄酒供應商在10月21日已經到港,重陽節翌日就由餐廳R帶同去跑馬地睇夜馬,供應商見到馬場內咁多外籍男女,本地年輕人擠在公眾棚飲啤酒,已經覺得驚奇,覺得馬場氣氛好到冇得頂,第二日下午,餐廳R帶供應商到美酒佳餚節場地巡視,裏面只有工作人員,供應商對餐廳R講:「嘩,地方咁大,今晚開幕後少啲人嚟,場面會好冷清噃。」餐廳R話中環海濱交通方便,晚上有清涼維港海風,係欣賞中環及維港夜景嘅最好地方,驚都未驚過。果然,一到八點,人潮洶湧而至,酒客大量迅速淹沒整個場地,餐廳R與供應商幾乎走唔出佢地嘅攤位範圍,於是供應商大笑講wonderful,話在意大利及歐洲未見過同樣場面。餐廳R係笑容滿面,不過有啲苦苦哋,因為佢收到夥計短訊,話佢嘅集團屬下三間酒吧在蘭桂坊、銅鑼灣與中環附近,皆人丁單薄,酒客大量失蹤也。人客走咗去邊?咪湧晒去中環海濱囉。呢個美酒佳餚節可能係旅發局今年推廣節目之中,最多人氣嘅節目,至於人潮之中有幾多係外來遊客,就睇吓旅發局有冇法子統計到,但起碼全亞洲都無類似節目,香港變咗最有特色。聽講明年香港會有電動車賽車舉行,車場就在龍和道。如果在十月舉行就更正,最好係近住嘩鬼節,到時馬場有Oktoberfest,中環海濱有賽車及美酒佳餚,壓軸有南瓜鬼影出場,應該熱鬧到爆,大大吸引遊客專程來港!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載