› 選擇地區
三藩市
紐約
洛杉磯
其他美國地區
香港 台灣 北美
 
2015年11月12日

也談TSA - 左丁山

昨日講及考試必需,在中國人社會,冇考試就好唔掂,即使係司徒華一生最大政治成就,即成功爭取取消全港升中試,亦帶來不少後遺症,即係妨礙貧窮區域尖子學童升上其他地區嘅精英中學,有礙社會向上流動。
現在講到風潮四起嘅TSA(左丁山最初唔知係乜,聽完大記者講,先知係Territory-Wide System Assessment)(全港性系統評估),淨係睇個英文名字,已經摸不着頭腦,啲教育局官僚都幾有方法去弄到人人糊塗,咁即係乜呀?就係一個考試囉,夠笑話嘅係,教育局話考TSA唔駛事前操練,大把家長反對操練,教育專家教授話唔好操練,但市場唔會死錯人,有不少出版商出版TSA練習,就證明大把學生實際上係有操練,學校唔施壓嘅話,學生操TSA做乜鬼喎,貪玩咩。學校目的係乜,真耐人尋味,睇落實係與金錢有關,金錢即是每月薪水,唔少學校驚住TSA成績唔好就會引致家長捨棄,跟住收唔到新生,收唔夠學生就會被殺校,校長老師全部冇得撈,為保飯碗,點都要催谷學生考TSA啦。
之不過,教育局三番四次公開講TSA與殺校完全無關,TSA成績唔會公開。但講極都冇人信,可見教育局已經冇晒公信力,可哀也。
問一位老師,TSA究竟係乜程度?佢話小三學生理論上按照小三官方訂下之課程指引範圍考試,但事實上,考試程度高於小三,故此學校咪要操練學生囉。咁都得?教育局與考評局冇聯絡嘅咩?啱啱呢日揸車聽收音機,一位退休英文女教師講得好激動,佢話2004年,佢應邀為小三TSA英文科出試題,佢百分百按照小三學生課程範圍擬定試題,點知考評局唔收貨,話題目太淺,試題審核員認為要提高啲程度!女教師不服,三番四次追問試題審核員係乜嘢專業,得到嘅答案係,一位教中七嘅英文老師。呢位女教師好激氣,認為不應以中七程度睇小三,拒絕修訂。咁講法,逼學校及學生操練TSA,考評局可能係罪魁禍首,如果TSA小三試真係考小三課程範圍嘅話,所有小三學生駛乜操得咁辛苦呀,現教育局長吳克儉以前係教評局主席,佢最知得清楚啦,唔該佢開個記者招待會,向全港小學、家長、教師解釋,以釋疑慮。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載