› 選擇地區
三藩市
紐約
洛杉磯
其他美國地區
香港 台灣 北美
 
2015年11月23日

水就係水 - 左丁山

一位波友老友唔滿意左丁山唔明顯擁護香港足球隊,懷疑左丁山係唔係梁特、林鄭之流,夠晒閃縮。
支持香港足球隊,左丁山幾時都唔會動搖,但支持還支持,香港隊水平不足以當大任,誰可否認?你鬧我都係咁講嘅啦,睇香港主場對卡塔爾與中國,均是全場捱打,靠泊架大巴士喺禁區,全力死守,幸好門將葉鴻輝狀態大勇,屢救險球。對中國隊更有足球上帝眷顧,對方屢屢射波中柱、中楣,如果唔係,輸咗好耐啦。泊巴士戰術,英超常見,車仔摩連奴就大罵對手泊巴士唔係踢足球;但佢係有口話人啫,車仔對拜仁、對巴塞之時,摩連奴咪又係用泊巴士戰術,守和當贏啦。
死守突擊,希望偷雞取勝,先決條件係要有快鋒快翼好似禾確特、史達寧、蘇亞雷斯呢類型球員。香港隊冇邊一個係快鋒快翼,速度明顯不如人,故此只能死守有餘,突擊為艱。香港隊之防守有進步,皆因有咗一啲體力比較好、身高腳長嘅外來入籍球員,幾位外籍人士雖然技術粗糙,勝在鬥志一流,體力好,頂得住對中國攻門,香港隊如果係全華班恐怕老早輸咗波咯。
外籍球員歸化當地,係全球趨勢,無可批評,西班牙前鋒迪哥斯達(車路士主將)係巴西人,情願入籍西班牙,拜仁年青中場主力阿簡達拿亦係巴西人,但選擇代表西班牙,香港係國際城市,不同種族人士齊集,外籍球員在港住滿七年為咗踢波,加入香港隊,有何不可,法國隊荷蘭隊老早唔係純白人隊伍啦。
可惜嘅係香港限於特殊環境,足球場用地太多,變成係一個奢侈活動,難有光明前途,自精工寶路華等商業球會唔玩之後,本地足球缺錢缺地缺人,職業足球能夠維持到依家已算難能可貴,球迷實在難以希望香港足球隊可以贏亞洲盃或亞運金牌,重現六十年前嘅「亞洲足球王國」之威風。香港隊水波,難以怪責,但13億人嘅代表隊水波,就一定要鬧,新華社稱之為國恥,有幾分道理,不過最無恥的,唔係球員而係擁有龐大經費,中央寄以厚望嘅中國足協,習近平應該將全部中國足協管理層剷起,要嗰班足協領導負責,徹底改造,換另一個外籍教練係冇用嘅,現時呢班中國國腳,搵摩連奴去教都唔掂。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載