› 選擇地區
三藩市
紐約
洛杉磯
其他美國地區
香港 台灣 北美
 
2015年11月24日

友誼賽 - 左丁山

上星期係全球足球界之「國際賽周」,有正式比賽如世界盃外圍賽(如香港對中國),有非正式之友誼賽(如德國對荷蘭,英格蘭對法國),點知十一月十三日黑色星期五,法國在巴黎法蘭西運動場應戰德國之時,就發生恐怖襲擊慘劇,法國中場球員迪亞拉(非洲裔歸化法國籍)嘅表妹在音樂會被亂槍掃射致死,另法國前鋒基士文細妹亦在同一個音樂會,有幸運之神眷顧,大難不死,逃出鬼門關。
法國對德國一戰,雙方球員雖未接獲正式通知,但已隱約覺得有事,雙方無心戀戰,德國以○比二敗陣,草草收場,球迷事後留在球場等警方通知,先至離開,法國球員一直留在更衣室唔走,等到德國球員可以安全離開,直上巴士奔往機場乘搭專機回國時,法國球員先至離開,以示彼此支持。
到咗十一月十七日歐洲時間星期二晚上,法國要到倫敦溫布萊作客,英國足總事前曾問法國足總:「駛唔駛取消賽事?」法國足總一口拒絕,聲言足球十分重要,一切如常,不能向恐怖分子示弱。法國領隊迪更斯於是向球員講:「邊一位想退出,我會明白,一啲都唔介意。」但23位球員異口同聲咁講:「我地去倫敦。」包括迪亞拉與基士文在內,呢啲行為,就係We are France之最高表現。
英法球賽開始前,兩隊領隊陪同劍橋公爵(威廉王子)向巴黎受害人士獻花致敬,跟住奏起法國國歌,全場七萬二千球迷一致站立齊唱馬賽曲,在場法國觀眾深受英國人之友誼感動,眼都濕晒,法國門將萊里斯(熱刺)尤其向英國球迷致敬,英法傳媒一致讚揚呢場球賽係真正Friendly,至於英格蘭淨勝二比零,已經冇乜人提咯。可惜嘅係,另一場德國荷蘭友誼賽,就收到虛報炸彈威脅,臨時取消。明年歐洲國家盃在法國舉行,本可為法國帶來大量遊客,但現在蒙上恐襲陰影,虛報炸彈謊言等等,到時球賽會否臨時取消,或者受到真正襲擊,冇人敢擔保。恐怖分子除咗要惡意造成人命傷亡外,亦刻意破壞歐洲人之正常生活文化,讓歐洲人生活在恐懼中。近日巴黎有好多年青人特登多出街,多到咖啡室,bistro,以示生活正常,就係在行為上對抗恐怖主義!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載