› 選擇地區
三藩市
紐約
洛杉磯
其他美國地區
香港 台灣 北美
 
2015年12月21日

從小考到大 - 左丁山

一個小三TSA,搞到教育界與教育局反晒枱,小學校長協會公然與局長搞對抗,都幾唔俾面,以前啲校長見到視學官已經腳軟,見局長更加誠惶誠恐,邊度會好似現在咁平起平坐,指罵教育局亂嚟㗎。不過吳克儉冇民望,在教育局內亦不見得有幾多官員肯大力支持,小學校長會鬧吓佢,大概唔會有嚴重後果啩?否則嘅話,津貼學校要向教育局申請一分一毫去維修舊水喉,都可能等多兩年呀!
其實TSA呢樣東西,雖然名稱不同,OECD國家大多有之,係用嚟評估學校教學進度,果效(outcome)及學生程度嘅,外國有不少學校好鬆散,學生讀完小三都唔知識得乜,做番個考試評估未嘗唔好。只係香港環境特殊,甚麼外國圓月亮來到香港就會發生質變,本地學生本已勤於上學,家長與學校皆是緊張大師,絕不如外國公立學校咁鬆散,一加多個TSA喎,本着不要輸在起跑線嘅原則,學校、學生及家長仲唔拚命練習咩,考試題目又離譜,脫離小三學生程度,學校學生家長更加驚啦,加上香港還有一個殺校問題,小學收生一個不能少,本地家長為子女申請入學,常以學校公開試成績為依歸,學校有乜辦法唔日操夜操啲學生呀?依家操出個大頭佛,一啲家長要求廢止TSA,以左丁山意見,冇咗TSA,一樣有其他誘因(舉例如千方百計升上著名中學),令到學生勤操甚麼練習題。
上星期六到五星酒店食家庭聖誕大餐,碰到銀行見習生T一家人亦在座,大家食得高興,一眼望過去,見到見習生T好似刨緊書喎,奇怪之下,行埋去八卦吓,果然,佢讀書勤力過吳克儉,一邊食頭盤,一邊讀緊「公司理財」,點解咁殺風景呀?見習生T話:「星期一考IB Final呀,唔該唔好問咁多啦!」佢入銀行就收到「忠告」要考乜考物,入行兩年,已考到「風險管理」銜頭,繼續要考香港銀行學會會士資格(AHKIB),考到之後,30歲前考埋CFA,好彩佢讀幼稚園係讀靈糧堂,冇功課嘅,有一個快樂時段,入小學之後就過關斬將,考試持續十三年直至殺入中大。畢業後入銀行,以為唔駛考試嘞啩,點知仲有大把等住佢。香港人自小已培養成為考試動物,慣咗咯。跟住星期一去銀行食蛇,大班話:「依家啲銀行沙紙要求多多,考少一樣都唔得㗎,冇牌就難升級,銀行淨係訓練職員考試攞牌,已經要用唔少錢!」左丁山以前只考過倫敦IB,照現時規矩,幾難在銀行界立足!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載