› 選擇地區
三藩市
紐約
洛杉磯
其他美國地區
香港 台灣 北美
 
2015年12月31日

退保角力 - 左丁山

呢兩日本欄講大官林鄭月娥罵周永新關於退保研究一事,老友地產A閱後來電話:「喂,林鄭其實係鬧佢嘅老師噃,我在港大讀法律之時,女朋友係讀社工嘅,上過周永新嘅堂,嗰陣周永新應該係講師(lecturer),同樣修讀社工嘅有一位同學叫做Carrie Cheng,照計Carrie都有take過周永新嘅course。現在鄭同學變咗林太,乜咁唔俾面周老師呀!」
林鄭是否周永新學生,有待證實,因為地產A未確實知道她是否上過他的課。若論資排輩,周永新當然係林鄭嘅師長輩啦。
獅子山學會王弼即將在鰂魚涌開辦「奧國經濟學院」,與各界朋友研讀奧地利經濟學派(Austrian School,即發揚古典市場經濟學說之經濟學流派),忙碌籌備之餘,與左丁山談及今次嘅退休保障諮詢。幾年前佢與施永青一同出席論壇,反對全民退保,與黃洪及蔡海偉兩人舌戰一番。現在又試砌過嘞,施永青在am 730專欄明刀明槍反對全民退保,講:「香港的大學生連畢業後要還自己花掉的貸款也不願意,怎可想像他們肯為上一代的養老需要作承擔?自己父母也不肯養的人會『老吾老以及人之老』嗎?」
施老闆火氣十足,王弼就話林鄭鬧完之後就由圓滑油條張建宗局長出嚟降溫,話八萬元資產上限有商量空間,那邊廂周永新不贊成較年青學者杯葛退保諮詢,大有主張「袋住先」之勢,再加上社聯行政總裁蔡海偉拋出一百萬元資產上限建議,故此王弼話:「睇怕就係全民退保一定冇行,有限度向長者派錢就有得傾。政府開價八萬,社工還價一百萬,黃洪話不參與諮詢,周永新話應該傾落去。你諗深一層,就明白政府玩一硬一軟,社工亦然,兩個硬嘅要拉倒(林鄭、黃洪),兩個軟嘅(張建宗、周永新)主張慢慢傾,中間派蔡海偉就還價,或者中間落墨,大家同意資產審查上限係三四十萬元嘅話,就可以將退保呢塊蛋糕送入焗爐(立法會)焗熟嘞,至於立法會議員點諗,到時先至諗,梁振英政府算係交咗差,蛋糕焗不熟,咪賴晒啲唔贊成嘅議員囉。」王弼似乎識編劇本,但又似層層,冇乜可駁斥之處。
橫睇掂睇啲政府數字,全民退保必不會推行,有限度扶貧式退保就無所謂,如果社工界唔收貨,一拍兩散正中梁振英林鄭下懷。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載