› 選擇地區
三藩市
紐約
洛杉磯
其他美國地區
香港 台灣 北美
 
2016年01月06日

讀書辛苦 - 左丁山

左丁山呢一排讀咗不少討論TSA嘅文章,覺得教育學者未免陳義過高,普通讀者睇唔明。家長反應一分為二,一派贊成,一派反對,前者覺得TSA冇乜唔妥,後者認為TSA整體係剝奪學童身心健康。邊個啱呀,好難下結論。有一晚到靈堂向親戚致祭,見到一位小妹妹跳跳蹦蹦,雖知道佢嘅舅公歸天,仍然天真到不知愁苦,笑口迎人。左丁山問佢:「你讀幾年級?」答曰:「三年班!」再問:「咦,要考TSA喎,有冇補課補習做練習?係唔係好辛苦?」小孩答:「冇呀,TSA好易啫,同學校教嘅功課冇乜唔同。」呢位小女孩原來就讀於深水埗某著名小學,教育版新聞見過,話呢間學校以功課多而聞名,但小女孩話:「十樣八樣功課好閒啫,我有時間玩嘅。」想深一層,當年肥仔K讀一間好普通嘅小學,亦經常有十樣八樣功課,以前未曾驚過,今日則大把家長嘈,可能係思潮有變,社會形態與以前不再一樣咯。
小女孩外婆、媽媽在座,睇見佢地三位女士,幾有感觸。外婆讀小學畢業,因家貧,不升學,讓細佬讀上去,此乃60年代常事,貧家女要讓弟弟升學,因此外婆一生做基層工人,醫院女雜工,捱大個女,女兒住在公屋苦讀,冇錢補習,靠自己努力考入科技大學會計系,畢業成為會計師,生活穩定,於是到咗第三代,小女孩可以入讀名校。呢個活生生的50年來一個基層家庭之進化故事,全香港都有,所以小女孩母親話:「讀書係要勤力苦拼嘅啦,考TSA冇乜所謂。」點解有咁多家長覺得有所謂,TSA試一定要廢除呢?而且意見好強烈噃!左丁山唔識答,只知道不少朋友高呼要送子女到英美讀書,脫離香港教育苦海,就未免天真一啲。如果外出讀書係求輕鬆,避開太多考試,求求其其入到大學,到英美係啱嘅,但如果望子成龍,要求兒女至少入到UCL、LSE,進而一步入長春藤大學,牛津劍橋嘅話,到英美讀中學一樣緊張無比,讀到仔女嗌救命。美國普林斯頓大學附近一個校區West Windsor-Plainsboro,以一流學校聞名,學生入MIT,拿奧林匹克科技比賽獎狀,贏音樂比賽,及考SAT滿分嘅學生,比比皆是。最近學校區教育總監要求學校有一晚不設功課,取消中期試,目的係讓學生不要死讀書,放鬆啲可以去玩吓!但所有亞裔學生家長都反對,抗議之聲四起,因為咁搞法會導致學生水平下降,考唔到哈佛MIT喎,但白人家長就贊成呀。香港學生出到去,要跟白人學生玩吖,還是跟亞裔學生苦拼?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載