蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年01月07日
馬上成為壹會員

騎師火併 - 左丁山

新年元旦日係月破日,左丁山在專欄多事講咗一句「子午相沖」(戊子月撞壬午日,戊土尅壬水,子水尅午火),唔通馬場會爆冷?入到馬場就俾兩三位相熟老友追住問:「邊場會爆?」鬼知咩,如果有早知,左丁山可以靠馬場發達啦,那會長年做善長仁翁。是日跑十一場,每場馬嘅前三名還算賽果正常,熱門算穩陣,但第四名往往爆出幾十倍大冷門,於是造成三重彩派彩一般,四連環、四重彩就非常和味嘅局面。只是莫雷拉現在騎牛都熱,韋達就在沙圈俾馬迷噓到黑口黑面,十三屆冠軍騎師今年竟然如此難堪,都幾值得同情,唔通韋達就此一蹶不振?唔會啩,前屆騎師冠軍潘頓只係30歲出頭,鬥志猶在,第三場騎3號「琪麟穎」與莫雷拉隻1號「領驫」成為兩大熱門,兩人鬥得燦爛,騎足一條直路,睇住「琪麟穎」領先一條馬頸,點知莫雷拉果然打得,力騎之下,唔遲唔早,終點前輸,終點後輸,偏偏在終點影相,贏咗一條鼻毛,潘頓與馬主及練馬師必定氣頂到彈起,潘頓尤其條氣唔順㖭啦。
第五場又係莫雷拉潘頓大熱,雷神隻馬「魅力知心」應該優勝啲,但已輸紅了眼的潘頓今場出閘就力推向前,一改隻馬以前後上取勝嘅跑法,與擅於放頭嘅「魅力知心」鬥搶鬥放,莫雷拉睇嚟唔係幾忿氣,亦極力搶放,於是返到直路,兩隻馬一齊散晒,俾冷門騎師霍勵賢騎隻「春意溢然」後上爆22倍冷門,第7場潘頓騎「喜俊寶」又纏鬥莫雷拉隻大熱門「添好運」,兩大騎師鬥出火花,兩敗俱傷,馬迷有好戲睇,以後兩人同場之時,要考慮埋呢個因素。有時物極必反,莫雷拉今季可講得係一人獨大,隻手遮天,個個馬主都話想贏馬要搵莫雷拉,於是乜嘢靚馬都讓雷神揀先,佔盡先機,益發造成雷神橫掃嘅局面,其他騎師無論過往如何大牌,盡皆面目無光,故此潘頓輸完「琪麟穎」之後,不惜用牌仔騎師方法,拼命搶放,務求燒死莫雷拉隻馬。左丁山此日輸到第十場,已經輸到是日預算上限咁滯,見此形勢,為求翻身,索性飛咗莫雷拉隻大熱門1號「飛廉之子」,改以7號馬「當代沙皇」拖全餐博爆冷,老友股票H係要以1,7雙膽拖餐,佢話莫雷拉點都會在前面返來喎,哈哈哈,世事往往邪門,7號跑第一,1號跑第四,股票H氣頂到爆,左丁山條單T餐因爆出大冷腳,竟然一注分一萬四千四,左丁山收錢時幾乎笑到流眼淚,真係子午相沖爆大冷呀!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載