› 選擇地區
三藩市
紐約
洛杉磯
其他美國地區
香港 台灣 北美
 
2016年02月03日

容不下索羅斯 - 左丁山

昨日講及的士司機大罵李波事件不合情理,建制派冇腦,胡亂搵個藉口呃港人。唔好以為將李波事件搞大,係泛民議員多事,其實坊間基層可以屈膝於權力,怕咗阿爺,但佢地最唔鍾意俾人當係儍仔。北京強力部門若肯企出嚟大大聲講:「我地在泰國拉咗桂民海回國,自香港搵李波回來協助調查有關佢地在香港出版謠言書籍,詆毀領導人一事,合乎中國法律,外國人無權干預……」講完之後,好多香港人就知道天威莫測,不敢輕舉妄動啦,但是是但亂尋藉口,當港人係笨豬,港人當然不服。
深層次啲睇,中央不准人民亂唱亂講,鎮壓言論自由,不派司法部門檢控誹謗,改用強力部門拉人,係大大打擊21世紀作為世界第二大經濟體系嘅形象,中國要走上世界舞台,與美國歐洲爭一日長短,點可以長期倚賴拉人封艇嘅手段吖。一個沒有言論自由、資訊自由的國度,點可以在開發新科技(唔敢講新文化、文學、藝術各方面嘞)、新經濟與歐美競爭呀?左丁山打死唔認為北京中關村啲北大清華復旦(泛指各大名校)嘅電腦工程科目學生,畢業後可以在大膽創新、嘗試方面勝過世界精英雲集嘅矽谷。中國最叻嘅科技人才,只要俾矽谷睇起,都會第一時間為咗自由,為咗綠咭而賣身美國,至於攞完綠咭之後再回國創業,進攻13億人市場,那是另一回事。馬雲咁巴閉,至今阿里巴巴有邊一件軟件係全新中國創造令ebay和亞馬遜舉手投降㗎?索羅斯身在美國,接受彭博訪問,聲言沽空標普五百指數,白宮一句聲都唔出,以中國尺度,索羅斯根本係背叛美國啦。索羅斯話明中國有三萬億美元儲備,可以捍衞人民幣,言下之意就係佢唔會亂咁去衝擊人民幣,但人民日報立即視之為仇敵,器量小得可憐。中國市場基本上係關閉式系統,中央隨時可以一秒鐘內改變遊戲規則,扼殺外來炒家。醒目仔如索羅斯,點會胡亂冒犯中國嚟搵食?中國財金官員弊在黨性太重,動輒講敵我矛盾、民族大義、外人謀我之心不死,不能容納不同言論。有此心態,上海一定冇希望成為世界金融中心,香港完全唔怕上海威脅,只怕梁振英及其他擦鞋仔自毀長城,打爛一國兩制啫。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載