› 選擇地區
三藩市
紐約
洛杉磯
其他美國地區
香港 台灣 北美
 
2016年02月04日

今日立春 - 左丁山

上星期收到老友B寄來一張字條,附上2015年2月4日「GG細語」影印本。字條寫住:「立春快到,唔該你循例寫一寫,驚你唔記得,舊年你講得幾啱㗎。」
睇番去年影印本「今日立春」,確係驚驚地,2015年年初股市地產興旺,升得好有氣勢,但當日引述八卦丘之言:
八卦丘推論話:「羊年木多壓土,恐怕房屋土地要受壓,樓價回一回氣,不足為奇,買樓買地產股要謹慎啲,日主辛金體弱,雖有壬水(藏於亥)沖洗,顯得清高,但無己土生發,金融唔會叻得去邊,股市係浮浮沉沉格局。」政治方面就咁講:「去年甲午年,天干屬春,地支屬火,火焚木,以下犯上係常態。今年則調轉,上乙木下未土,下面受壓制,故此去年學生反政府,今年就係政府砌學生咯,梁振英政府會採取強硬政策對付反對人士!」
一年之後重閱,八卦丘竟然講中晒,試睇吓港大學生反李國章(即係反梁振英),落得俾校長馬斐森稱之為「暴民」,點奈得政府何!去年陽曆四五月間,股市進入「大時代」喎,邊度有人敢講到咗年尾,樓股皆面目全非㗎。
既然如此,又打電話搵八卦丘批一批,八卦丘一開頭就話,羊年立春指示,似乎幾準,今年講猴年,有啲心理壓力,姑且又講番幾句,請大家指點、包容。
閒話幾句,步入正題,八卦丘講:「2016年2月4日立春之八字係丙申年庚寅月丙辰日丁酉時,申年寅月,寅申相沖,係月破日,主大事勿用。八字有三火三金一木一土,缺水,丙火日無水,乾燥得滯,火猛則易燥,恐怕全年易生火爆事件,起因或係上欺下,因丙申年天干為火,地支為金,火剋金,上剋下,以前就話下面會忍氣吞聲,21世紀就可能下面不服,明知輸都要反撲,咪即係話今年社會不和諧,搵交嗌,示威遊行不絕囉。
寅月係正月,春天正月木氣當旺,丙火有生氣(因木能生火),火旺則能生土,故此房地產應有生機,有支持,火多剋金,金融唔敢睇好。仲有,要木生火,木必須先裁剪,即要有金劈木,方才有用。立春八字之中有三金,剛好用來裁剪寅木來生火,故此猴年真係幾旺火,電腦、電子、電力、石油等屬火行業有希望噃。還有,地支有辰酉,辰酉化金,加強金之威力,故此綜合而言,立春之日火金並重,火雖剋金,但丙火(太陽之火)不是丁火(用以煉金),故不至剋制太甚,而庚金為丙火之偏財(橫財也),如在這個八字出世,主有橫財命,在股市而論,旺埋濠賭股都唔奇。全局唯一缺點就係無壬水(陽水,即江河之水)配合,驚住突然之間爆火,嚇人一驚。當權者要記住有權不可盡用,凡事留有餘地就有益大眾。」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載