› 選擇地區
三藩市
紐約
洛杉磯
其他美國地區
香港 台灣 北美
 
2016年02月08日

注意吉時 - 左丁山

今日二月八日丙申年年初一,以農曆曆法講,二月四日立春就係轉節氣,正式踏入丙申年猴年,故此由今日開始嘅猴年,冇咗立春,俗稱「盲年」,不宜嫁娶,但現代人時間寶貴,如果要結婚嘅話,邊可以等一年咁耐呀,正是水到渠成,時機啱就拉埋天窗啦,容乜易等多一年而冇行動,搞到甩拖㗎!
一月一日係破日,二月四日立春係破日,今日年初一丙申年庚寅月庚申日,遇着申年寅月申日,寅申相沖,即年月相沖,月日相沖嘅破日,認真唔盞,睇蔡伯勵通勝指示吉時,要趨吉避凶,幸好早上七時(辰)至下午一時(未)都係吉時,正好在此時段拜神拜年,祈求全年大吉,凌晨一至三時(丑)亦吉,早上五至七時(卯時),黃昏五至七時(酉時),晚上九至十一時(亥)就係「中」,按蔡伯勵大師講法,將時辰調校為香港時間,可延遲大概30分鐘(即亥時係晚上九點半前一兩分鐘至晚上十一時半之前一兩分鐘)。出行向正東方迎財神,西南方迎貴神。
講呢啲似乎迷信,不過一年一次,中國又未好似日本咁脫亞入歐,廢除農曆,民國時期,有句順口溜──好似係:官府行陽曆,民間紀夏時,我地講吓曆法五行,好平常箒。肥仔K在去年十二月尾去日本旅行,既跟隨日本人在一月一日元旦日去明治神宮,又在淺草雷門觀音上香(兩個地方都逼到爆),跟住買咗一本日本猴年運程書,可見西化咗嘅日本人根本係實行曆法「雙軌制」,並未完全「脫亞入歐」,我地香港人更加唔會啦。馬克思主義係百分之一百外來勢力,1949年10月佔領中國大陸之後,共產黨大力清除舊習俗,但自四人幫倒台,進行「改革開放」之後,中國大陸民間又興起五行之說,算命書、風水書大行其道,據講去年呢個市場(即風水算命書)銷售量高達50億元人民幣,幾令香港啲運程書作者流口水!不過香港人帶書報雜誌回鄉過年,千萬要小心,因住冇運行。過年前一次「團年式」飯局,地產F話佢有兩位朋友到深圳開會,一人帶一本「亞洲周刊」,俾羅湖海關搜出,以前最多被充公,警誡兩句嘅唧,點知呢輪「風聲緊」,海關充公兩本亞洲周刊之後,要填表報告等上司蓋印,哎,一等就係三小時。兩人等到面青,驚住會成為合法出境嘅李波,佢地早已醒目,唔帶壹週刊嘅啦,點知帶親近中方嘅亞洲周刊都唔得啫。大家北上,最好帶梳蕉算嘞,唔好帶書本雜誌呀!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載