› 選擇地區
三藩市
紐約
洛杉磯
其他美國地區
香港 台灣 北美
 
2016年04月10日

高危戶口 - 左丁山

一位榮休教授要去美國開會,因退休後多年未去過美國,要攞簽證,以為只係例行公事箒,點知因為填表時,在職業一欄填上「化學家」Chemist,竟然搞到阻阻滯滯,攞到簽證時,美國會議已經結束咗咯。事後了解,美國對一啲職業好敏感,如「化學家」、「生化學家」,唔好以為係純學術型,但在美國國土安全局眼中,呢類人係危險過「記者」、「作家」、「教師」嘅,識製炸彈就係呢類人吖嗎!美國為咗反恐,已經神經緊張到極,我哋外國人去美國千祈唔好以為世界太平,拿反恐嚟開玩笑,搞gag講幽默,呢啲嘢係唔講得笑嘅。
反恐手段之一係切斷恐怖組織嘅金錢網絡,徹底打擊任何可能為恐怖組織洗錢嘅渠道,前一排見到一間國際銀行大賓架,左丁山係咁意反映幾句,現時開設銀行戶口好難,銀行簡直係唔想做生意,要趕人客走,例如美國人或美國綠卡持有人最不受歡迎。大賓架眼仔一睩,對左丁山講:「本地人,有熟人轉介,都可以快啲嘅,兩三個禮拜啦。內地富豪,如果係上市公司主席,都係一個月左右箒,其他人呀?三唔識七,搞三個月都未必掂,最好唔好行入嚟,依家要照足美國與香港嘅KYC(Know your customer)、AML(Anti-Money Laundering ),及美國FATCA,我哋做到勞氣兼高成本,有生意唔敢做㗎。」左丁山又向佢投訴一啲非牟利機構,歷史悠久,身家清白,都要俾銀行趕走,大賓架話:「呢呢,你out咗嘞,美國方面指示,恐怖組織最擅於利用非牟利組織,冒充慈善團體或宗教團體,透過所謂善款捐款嚟洗錢,所以我地要特別注意宗教社團等非牟利團體,視之為高危客戶,嚴密監控,三個月內戶口冇乜活動我地就主動打電話去追問,如果搵唔到人呢,就要清除或凍結呢啲戶口。」唉,銀行變成「反恐前線」,偶一不慎俾不法之徒在銀行利用戶口轉換資金作奸犯科,咁就大件事,依家做義工社團都係危險戶口,成乜世界。
講完之後幾日,遇到大律師M親自去銀行,問佢點解唔由信差代勞,大律師M話:「慘,我地新成立一個賽馬團體去抽馬,點知用Syndicate名義仲未開到戶口,我係經理人,真係煩親自己,H銀行你識唔識得人?」咪講笑,老友還老友,識都話唔識!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載