› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

發展足球 - 左丁山

英超足球因為電視直播費龐大,20支英超隊伍收入有保證,成為世界級富翁、財團爭相投資對象,幾間大球會都有外國股東,例如曼城由卡塔爾石油家族佔大股,曼聯屬美國格利沙家族,阿仙奴主要股東來自美國及俄羅斯,車路士東主係俄國油王阿巴莫域治,利物浦大股東係美國體育事業投資者亨利,即使係次一級球會,過往有富咸(埃及富商)、伯明翰(香港楊家誠),卡迪夫城(馬來西亞華商),昆士柏流浪(Air Asia老闆)皆曾為亞洲人控制,但最神奇、最本少利大嘅當然係李斯特城班主Vichai S.(泰國華裔富豪),V先生在2010年8月入主李斯特城,2014年球隊由冠軍聯賽升上超級聯賽,今個球季有望贏英超錦標,篤定可以參加下季歐聯,有機會與皇馬、巴塞、拜仁呢啲超級球會對壘,簡直係夢幻成真,名利兼收。
中國超級富豪王健林買下西甲馬體會股份,但西甲長期由皇馬、巴塞主宰,馬體會成日做三奶,王健林未必有得威,現在又有一個中資財團向前意大利總理貝魯斯科尼洽購意甲AC米蘭,趕在下一個球季開波前成事。但意甲已在沒落中,AC米蘭雖然有歷史有名氣,中國投資者好難獲利嘅,其實既然有咁多錢,到英國收購韋斯咸、修咸頓、史篤城等中游球會,博一博,將佢地變成李斯特城,可與Vichai S.媲美吖,起碼將球衣心口廣告改成中國貨品品牌,電視宣傳作用好高(例如李斯特城球衣上之King Power,愛華頓球衣上之Chang,令呢兩隻牌子全世界流傳)。
中國自習大大上台後,話到明要發展足球,習大大有個中國夢,夢裏中國隊揚威世界盃,正是上有好者,下必有甚焉,各級政府機關全力推動,提高層次到由國家發展委統籌編製一份「中國足球中長期發展規劃(2016-2050)」,於4月11日發佈,等同於中國足球發展宣言,重要性不低於一帶一路!規劃方案內有七大任務,包括制度體系,人才培養,場地建設,豐富賽事,壯大足球產業,培育足球文化,促進足球開放等等,又分近期目標(2016-2020)打好基礎,中期目標(2021-2030)追趕亞洲成亞洲一流水平,遠期目標(2031-2050)全力實現成為世界一流足球強國。要打好基礎就要從學校做起,要開展實施小學、初中、高中、高校四級足球聯賽,鼓勵各級學生參與足球賽。中國目前13億人之中,選唔出11人踢波可以擊敗南韓、日本,實在羞家,現在由中央大力拍板,到咗2050年,信唔信中國隊可贏南韓五比零?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載