› 選擇地區
三藩市
紐約
洛杉磯
其他美國地區
香港 台灣 北美
 
2016年04月29日

「賽馬天下」40歲 - 左丁山

左丁山平時極少到快活谷跑夜馬,上星期三因有「賽馬天下」(Racing World)40周年紀念盃,吳社長嵩哥係要左丁山到場,就恭敬不如從命。時間如曾鈺成話齋,Time flies. Time lies. See Why。紐西蘭人奧馬勝(Matthew Oram)於1976年本是香港電台英文台記者,轉行創業,成立「賽馬天下」雜誌,憑苦幹與一枝生花妙筆,竟然可以憑一份賽馬月刊,經馬會郵寄與馬會會員,而吸引到大量名牌廣告,賺到錢買樓,唔到你唔服。
1990年肥佬黎收購「賽馬天下」,左丁山無端端做咗社長,力邀奧馬勝留低做顧問一年,於是跟佢學咗好多賽馬知識,連英文都學埋,"A horse, a horse! My kingdom for a horse!"呢句莎士比亞,就係佢第一個教左丁山嘅,佢仲好鍾意睇Dick Francis所寫嘅馬場奇情小說(造馬、貪污、情色交換必贏貼士等等)。左丁山跟佢做咗朋友,學習賽馬,又幾過癮。
眨吓眼雜誌已有40歲,輾轉之下,由吳嵩管理已多年,奧馬勝係劍橋歷史系碩士,英文文筆了得,吳嵩係聖保羅男女─澳洲商科學士,MBA,澳洲會計師,數字腦筋一流,兩人教育背景完全唔同,但有同一嗜好,就係賽馬,兩人同樣以賽馬為事業,名成利就,可稱異數。奧馬勝祖父係紐西蘭國會議長,以佢嘅劍橋背景,理應從政,吳嵩更係會計師樓大拍拿材料,但馬匹吸引力太大,同樣係受到"A horse, a horse! My kingdom for a horse!"嘅呼喚。
此晚坐在馬會行政總裁應家柏旁邊,久聞佢踢過足球,於是趁機問佢踢過邊隊,應加柏話:「慕遜加柏你聽過未?」睇德國波當然知,二十世紀七十年代中,呢隊波與拜仁慕尼克爭雄,幾好成績㗎。應總裁話佢代表過西德U-21隊,但未代表過西德國家隊。踢德甲幾辛苦,佢知道自己不會成為超級球星,就退出球隊,另闖天地,今天成為全球賽馬世界之鼎鼎有名人物,四十年前誰人可以預料得到?又順便問埋選購馬匹之道,應總裁話:「歐洲馬與澳紐馬有好大差異,香港賽馬模式又講求速度,在法國贏二千四百米嘅馬,到香港可能要跑三千米先至掂,但香港無此賽程,要在香港贏賽事,啲one-pace(均速)馬比較吃虧,有一段突發爆炸力嘅馬就好啲!」唔,下次到海外買馬,不妨記住。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載