› 選擇地區
三藩市
紐約
洛杉磯
其他美國地區
香港 台灣 北美
 
2016年05月13日

本土優先 - 左丁山

美國政治狂人特朗普有可能擊敗希拉莉,入主白宮,但目前仍在民意調查方面落後,如要後來居上,就要猛烈攻擊、抹黑希拉莉,希望即使搶唔到女人票,亦希望令到女人對希拉莉失望,大選時留在家中唔出門投票。美國選舉歷史上,從未有一個候選人在黑人、拉丁裔、女性三大選民群體同時失利而仍然可以贏到總統選舉嘅,最強硬嘅特朗普支持者係一群poor whites(白種窮人),其中又以因自由貿易而失去高薪製造業職位嘅白種中產階級及藍領工人為多,呢個族群在過往二十四年(由克林頓1992當總統計起)緩慢經濟增長期中最無得益,科技工業一日千里冇益到啲中學畢業生,製造業搬去墨西哥、中國,就對中學畢業嘅工人有直接打擊。況且白宮主人唔係耶魯,就係哈佛校友壟斷(1988年起,老布殊、克林頓、小布殊、奧巴馬,28年來皆是耶魯哈佛人輪流當家作主),如果今年真係希拉莉上場,又係另一位耶魯校友,普羅白種人覺得啲東岸精英專係搵佢地老襯,點忍得住口氣吖。
現在全世界都面對一個因量化寬鬆而產生嘅貧富懸殊局面,有錢而又識炒股炒金炒匯嘅金融精英以及有錢人大受其利,由美國至巴西,由歐洲至中國,皆是如此,平民怨憤積累已久,憎人富貴之餘,又討厭更窮之中東難民,外來移民走嚟爭飯碗、攞福利,於是各國形成「本土優先」思維,以打擊移民為首要政治目標,目前歐洲飽受難民問題困擾,奧地利總理因反移民政黨Freedom Party,贏得總統選舉,辭職下台;法國明年有總統選舉,奧朗德雖有當權派優勢,民望竟然落後於極右派「國民陣線」領袖瑪蓮勒龐;菲律賓總統選舉由翻版特朗普Rodrigo Duterte當選(杜特爾特,有廣東人血統),這人本是一個以強硬對付罪犯,維持治安而出名嘅市長,比荷李活電影Dirty Harry(奇連伊士活)還要dirty幾十倍,話要踢走人權法,殺盡惡棍。呢類人可以當選總統,自不然又係本土優先主義,能夠治理清除本市本土本國罪案嘅人就係好領袖,那管得佢識唔識國際外交、宏觀經濟吖。奧、法、菲、美之最新政治趨勢,有跡可尋,就係本土優先,閂埋大門唔理外人。今年香港立法會選舉,有冇香港特朗普、山寨杜特爾特呢類人呢?激進本土派究竟在那裏?無論如何,世界性選民反建制派情緒高漲,本港建制派(包括傳統泛民)在9月立法會選舉,有得震冇得瞓!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載