› 選擇地區
三藩市
紐約
洛杉磯
其他美國地區
香港 台灣 北美
 
2016年05月30日

市場主導語言 - 左丁山

電視台播出桂民海嘅新聞,一位中國女子模樣女士似在議事廳堂講佢嘅爸爸的遭遇,左丁山一路睇報紙一路聽,仲以為係美國女子講緊英文㖭,原來此位女士就係桂民海千金,佢嘅英文十分美國腔,同美國電視台主持人嘅發音無甚不同之處,一聽而知桂千金應該係留美多年讀書嘅學生。
唔好以為出版一啲大陸政要秘聞書唔賣得,桂民海在泰國芭堤雅有豪宅(佢就係在此失蹤),女兒留美多年,可推算桂民海搵銀有方,啲秘聞書為佢帶來不少利錢,真正小說家文學家恨都恨唔到。呢啲書似雜碎炒埋一碟,加啲鹽,加啲醋,再加大量煞有介事嘅對白,就夠晒juicy,吸引內地客啦。
總之內地人多市場大,有辦法打入市場,避過關卡,就可以猛咁抽水。現在澳洲上市公司之中,最大市值嘅一間農產品公司叫做「東方現代」,公司就在澳洲註冊,大股東就係強國人,種植蔬果地方係江西,全部產品在中國生產、出售,與澳洲無關,但點解特登要在澳洲成立公司、上市,然後集中百分百業務在中國呢?就係有辦法之人借澳洲招牌一用囉,澳洲公司出產嘅水果,中國消費者更有信心吖嘛;同樣道理,香港出產,出口當內銷嘅中共政治秘聞書,在內地咪有吸引力囉。
桂千金英文講到美國女生一樣,發生父親在泰國失聯一事之後,大概唔會返香港居住,工作。與佢同樣英文講得地道嘅香港男孩子、女孩子,比比皆是,不少會回流香港打工,適逢有不少人話香港學生英文唔掂之際,呢批人咪好着數?左丁山以此問一位人力資源專家、獵頭公司,佢話:「咁又未必,我所有嘅客戶,包括跨國銀行公司,都有一個共同要求,就係求職者若英文唔夠好,就費事面試,但若中文唔識,面試後就一定唔請,故此好多自小讀國際學校、留學英美、讀寄宿學校大嘅叻仔叻女,英文講到似BBC節目主持人,都未必搵到工㗎。唔識中文,今時今日好唔掂,原因就係中國市場太過重要。」
咦,咁講法,在不同高級會所,見到好多父母與子女交談,全用英語,會唔會有反效果呢?呢位專家話:「有㗎,細路講英文講得多,覺得容易,就會討厭中文難認字難寫,對中文失去興趣,冇法子學得好,大個咗就知道弊弊!呢點確係要注意及之,讀幼稚園時就要開始誘發小孩子學習中文嘅興趣。」

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載