› 選擇地區
三藩市
紐約
洛杉磯
其他美國地區
香港 台灣 北美
 
2016年07月05日

民粹梁振英 - 左丁山

美銀美林向美國客戶發通告,評論英國脫歐對股市有乜影響,指脫歐與特朗普皆受惠於民粹主義,以後好多民主國家選民會傾向反移民,要求增加公共開支,提高最低工資、反對全球化。
如此局面下,投資買乜嘢好?美銀美林建議三大類股票投資:(一)買黃金、(二)買民生股票,不買華爾街(指國際級大銀行)、(三)買公用股、高息股,捨棄奢侈消費品股。具體啲講,就係買地方銀行股、基層零售股(如沃爾瑪)、與民生有關嘅電力、基建等股份。
以香港角度睇,簡單啲講,就係(一)買金、(二)買恒生,不要匯豐,買大快活,不買大酒店,買港燈、中電、香港電訊、煤氣,不要周大福、Prada、廸生,買領展,捨棄九倉……
近日香港升得比較多嘅,正是上述股票,可見唔駛美銀美林提醒,香港投資者已識得趨吉避凶。民粹主義在香港久有歷史,素來由街工、前線、工聯會、工黨等政客鼓吹,後來又加入一啲本土驅蝗派,更加激進,佢地嘅主張就是公屋永不加租、提高最低工資、設標準工時、撤銷強積金對沖、全民退保、增加公共開支,特別係社會福利、不歡迎強國遊客、香港人優先、敵視新移民……一切令到歐洲經濟不振,問題多多嘅政策,都順手攞過嚟在香港應用。如果呢類政客當權話事,香港好容易變成沒有文化的假法國、山寨法國。
估唔到為咗競選,先是林鄭月娥,跟住梁振英,又陪埋民粹主義一齊癲,林鄭話要對付三座大山(強積金、港鐵、領展),梁振英接受南華早報訪問,竟然公開指責一間上市公司(領展)冇社會責任,只求租金進賬。堂堂特首,開腔干預私人上市公司營運,創下香港歷史先河,實在有失身份,點知領展一反富不與官爭嘅公關戒條(此是中國傳統,法治獨立國家則經常有),由相對低級嘅財務總監翟迪強回應,歡迎政府回購。都幾寸噃!政府不防有此一着,只得含糊其詞咁講,現時政府無回購(或稱國有化)領展嘅計劃。但非常好記性嘅梁振英邊會咁易因幾句說話就放手㗎,以後花生友有好戲睇。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載