› 選擇地區
三藩市
紐約
洛杉磯
其他美國地區
香港 台灣 北美
 
2016年07月17日

2017女人大晒 - 左丁山

財經記者D有一日突然對左丁山講:「我前日撞到一位師傅,佢話2017年女人當旺,男人退避三舍,我問佢如何得知,佢話係算出嚟嘅,跟住講咗一大堆八字,我完全唔明,聽講你又識呢家嘢嘅噃,你解釋俾我聽得唔得呀?」講笑咩,左丁山識少少扮代表就得,真正道理就要問真正大師傅如蔡伯勵,紫微楊。
返到屋企,睇吓萬年曆,明年立春之時係2017年二月三日晚上十一時三十三分,照農曆計就係丁酉年壬寅月壬戌日庚子時,壬水當旺,水屬陰柔性質,唔通就係因而推算到陰性當道,女人出頭?不過壬水係陽水(江海之水)喎,點推算呀,唔識,只是丁酉年之中,丁屬陰火,酉係陰金(辛),火氣唔猛,加上壬水夠強,2017年應該唔似得今年咁鬼火旺,火爆,有大火災咯。2016年怕火災,2017年怕有水災。
八卦之說,要再請教高明;不過如果觀察天下大勢,2017年可能真係女權當道,女士大晒。嗱,美國大有可能出現歷史上第一位女總統希拉莉,佢拍住聯儲局主席耶倫,美國呢兩位女將可以控制世界股票動向,歐洲方面,默克爾女總理最近民望上升,繼續係歐洲女強人,加上英國有女首相文翠珊,法國右派女強人勒龐呢位右派民粹當道,有力威脅奧朗德總統,亞洲方面,韓國有朴槿惠,台灣有蔡英文,緬甸有幕後總統昂山素姬,皆有一定影響力,牽動朝鮮半島與台灣海峽局勢發展。
此外還有IMF主席拉嘉德,對拯救歐豬國家債務有權話事,來自法國,影響力大過男總統奧朗德。西方四大強國,美德法英同一時間由女士發揮最大影響力,係五千年來歷史上第一次,唔怪得有算命師傅話2017年女人大晒,我地香港又點?咦,林鄭月娥近來動作頻頻似為入閘熱身,曾鈺成又傳出消息話中央唔會欽點,只要「當選者」係不反華反中反共嘅愛國建制派就得嘞,如此說來,林鄭與葉劉大有機會參選,扳倒梁振英,香港出番一個女特首,直情係迎合世界潮流。教育界方面,碰啱中大有空缺,要搵人替補沈祖堯,會唔會搵一位女教授成為香港第一位大學女校長?橫掂中文大學已實際上幾乎係女子大學啦。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載