› 選擇地區
三藩市
紐約
洛杉磯
其他美國地區
香港 台灣 北美
 
2016年07月27日

給代理包圍 - 左丁山

今個月,樓價指數回升,成交量回暖,更有深圳富豪來港掃商業大廈,斥資百億港元,面不改容,於是見到地產股帶動恒生指數衝上二萬二千點,發展商信和置業股價創52周新高,似乎一片好景噃。
咦,記得個幾月前,好多大行不斷唱衰樓市,最熊者睇樓市自高位會下跌三成,現時還未跌完;又傳出有銀主盤插水求售,但時至今日,一啲大行分析員竟然變臉快過四川名師,夠膽話樓市可能升兩成喎,呃鬼食豆腐咩,一時唱淡,一時唱好,一啲分析員嘅獨立思考能力幾成疑問,隨波逐流,人云亦云嘅分析員,永遠只是二流。
樓市好似回春,一手樓盤因有120%按揭,又有講123%,花招多籮籮,驟看幾吸引㗎,實際分析過,就係買家有小着數,冇大便宜,難以助長炒風,金管局毋須過慮。左丁山行經IFC二期,不時會被地產代理包圍,總有兩三人追住左丁山派單張,有一次幾乎好奇心起,想攞嚟睇吓,但又驚順得哥情失嫂意,不知用左手攞好,還是右手攞好,好唔好左右手齊攞呢?
見到監管L,順便問佢呢個問題,佢提出警告:「最好唔要,如果要睇睇,只攞一張就算,千祈唔好製造現場混亂。代理成功派咗一張傳單俾你,你就係佢嘅客,佢會保護你不再受其他在場代理追纏,但會要你簽一張紙確認你係嗰位代理個客,以後假若你真係買樓嘅話,你就要俾佣佢,假如你簽咗兩份,但後來只準備搵一位代理買樓,另外嗰位都會追你佣金。」
哎吔,好彩一份傳單都未攞過啫,唔怪得新樓經紀係會覺得搶輸行頭慘過敗家,如果睇到第二個行家行埋嚟爭取,起踭撞開甚至衝突開片,難免發生啦。監管L話:「淡市時佢地為咗生意係會死纏爛打嘅嘞,有時公司管理層捽數壓力大,冇成交都要有睇樓次數,用來向發展商交代,我有一位師奶朋友就不時俾相熟經紀call去做場戲,現場簽番張紙,到示範單位打個白鴿轉,全港37000個代理爭開單,搵食幾艱難㗎!」我地又唔係得閒得滯,無謂捲入呢啲現實荒謬劇。李四叔金句:炒地產股好過炒樓;現時地產股淨值相對於NAV(資產流值),還是有折讓,如果折讓消失嘅話,可以賺得幾和味,當然這只是一個希望。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載