› 選擇地區
三藩市
紐約
洛杉磯
其他美國地區
香港 台灣 北美
 
2016年08月04日

狼與狐狸之間 - 左丁山

朋友F有親戚自加州回港探親,一家三口搵朋友F做導遊,專吃米芝蓮街頭巷尾一星店,領略吓真正香港風味喎。啲街頭一星店其實唔易搵,朋友F只係熟悉中環灣仔銅鑼灣尖沙嘴,去到旺角已經投降,所以佢話做導遊原來唔容易。親戚居港三日就打道去上海北京,再經東京返加州,臨走之日,睇CNN,BBC,FOX都直播民主黨大會嘅希拉莉演講,朋友F問親戚到咗十一月會投票俾邊位。姨丈與姨媽都話:「我地唔理政治嘅,邊個做總統都一樣啦,移民三十幾年咯,未投過一次票。」表弟就大大聲用英文講:「今次一定要拉阿爸阿媽去投票俾希拉莉,特朗普好唔掂。雖然希拉莉都係老狐狸,信唔過,但兩個壞人之中,女嘅冇咁壞。美國政客幾輕視華人,就因為阿爸阿媽嗰一代從來唔投票。」哦,女嘅冇咁壞,所以投佢一票,希拉莉就算贏,也是不得人心。左丁山問三藩市老友,佢地話好冇癮,兩個都唔鍾意,今年會唔投票。美國民調顯示,希拉莉、特朗普兩人叮噹馬頭,咬得好緊,好難預測勝負,如果希拉莉勝出,可能就係民主黨競選團隊效率高,擅用Big Data電腦分析,在洗街拉票技術方面,遠勝共和黨之故(以上係華爾街日報記者印象)。
左丁山聽完希拉莉演講,相信佢一定係同初選勁敵桑德斯達成若干協議,佢所講之增加社會福利,增加最低工資,要1%富翁交多啲稅等等,皆有桑德斯嘅影子;為咗討好工會,佢又講要對中國強硬,重新談判貿易條件,以稅率懲罰將工作職位搬去海外嘅美國公司,立場與副總統基恩完全唔同(按:基恩在參議院係知名自由貿易擁躉,大力支持工會反對嘅TPP),反而近似特朗普。從經濟政策睇,美國兩位總統候選人都對亞洲不利,唔慌好嘢,如真係要揀,兩害相權取其輕,在狼與狐狸之間,都係忍痛要選老狐狸,隻狼脾性衝動,偶一不慎就會闖禍,害死全世界。女狐狸出道三十幾年,最識搖身一變,今日講咗,明天唔算數都得,等佢入咗白宮之後,咪又向中國示好囉。
紐約一位老友就在WhatsApp話佢覺得特朗普可勝,雖然大富豪彭博直斥特朗普係老千,畢菲特又挑戰特朗普公開討論報稅單,但中產以下嘅白人男人好buy特朗普係新人會帶來新氣象,好過對住位政治老婦人希拉莉咁鬼悶,何況民主黨掌權8年,係時候由共和黨主政咯!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載