› 選擇地區
三藩市
紐約
洛杉磯
其他美國地區
香港 台灣 北美
 
2016年08月05日

CIA無敵陰謀論 - 左丁山

Pokémon GO殺入香港之後,到處有人玩,只有左丁山呢類老鬼不為所動,唔去捉小精靈,只係想捉小精靈帶來得益嘅股票。
遊戲登陸香港第二天,左丁山已收到WhatsApp幾次,連接內地微信一篇長文,長文講乜嘢?經濟日報石鏡泉在七月二十九日全文照登,大家可以睇真吓,內容大意就係Pokémon GO源自美國中央情報局人員搞出嚟嘅玩意,暗藏殺着,收盡天下私隱,至於目的為何?自有CIA啲天才分析員去諗掂。
睇夏里信福做CIA分析員Jack Ryan就巴閉咯,賴恩博士知識廣博,兼且講得打得,保護美國,維護世界和平;睇麥迪蒙嘅Jason Bourne(叛諜),中情局就係一個陰謀陰險世界,培養刺客殺手殺人唔眨眼嘅機構;睇007占士邦電影,CIA就係英國MI6嘅蠢蛋表兄弟,成事不足,敗事有餘。
中國又點樣睇CIA?從內地微信源源不絕嘅文宣嚟睇,CIA就係外來勢力,所有世界黑暗事件之背後黑手,土耳其失敗政變係中情局策劃嘅,香港學民思潮、本土派、民主派統統係外來勢力(即CIA)金錢津貼嘅,菲律賓膽敢搞南海仲裁,係CIA設計,美國支持嘅,總之一切令中國不快之「反中亂港」之事,都有外來勢力在背後。
但勢估唔到,Pokémon GO都係CIA玩殘全世界,套取情報私隱嘅工具。呢日飯局上,有人煞有介事講CIA策動Pokémon GO,講到似層層,貿易C附和:「係啦,最衰係CIA,搞到我啲內地關係斷晒線?」何出此言?佢話習近平狂打嚴打貪腐之後,一向同貿易C有聯絡嘅部份高幹受牽連落馬,更多高幹一於按兵不動,拒絕美食美色,乜都唔批,唔做,搞到貿易C冇啖好食,生意大減。又關CIA事?貿易C話:「你諗吓啦,事情當初由薄熙來下馬而起,佢嘅馬仔王立軍喺2012年(按:是年2月6日)走入成都美國領事館,逗留一日,做乜嘢呀,梗係向美國情報人員爆料啦。之後就搞到谷開來、薄熙來下馬,然之後又到周永康、徐才厚、郭伯雄呢啲大老虎,梗係CIA做好晒file,等習近平訪美之時(按:2012年2月13至17日),由奧巴馬親手交俾習近平,當作賀禮。習上台後就利用呢啲線索,調查嚴打貪腐及軍中將領,習近平訪美有董建華隨行,聽講就係憑此方便,董先生在習大大面前力薦梁振英嘅。董先生同美國關係好到不得了,你話有無受美國影響呢?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載