蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年08月26日
馬上成為壹會員

奧運之後 - 左丁山

2016年里約奧運曲終人散,一眾朋友在飯局猶自喋喋不休、講完又講。今屆奧運特別多體育之外嘅花邊新聞,包括巴西人示威抗議主辦奧運;醜陋的美國金牌泳手洛捷迪虛報被劫講大話唔眨眼,好快就被揭穿西洋鏡,贊助商第一時間離棄佢,不再贊助,令呢位大話精金錢損失慘重,以後大概要退出泳壇;又有愛爾蘭奧委會主席涉嫌賣黃牛飛,在酒店房間沖涼時被警察拘捕,狼狽不堪,丟晒架;中國女泳手被驗出食禁藥,亦係羞家。
好彩,還有正能量新聞,美國游泳巨星菲比斯創下前無古人,相信一千年內後無來者嘅五屆奧運累積23面金牌紀錄;牙買加飛人保特就創下田徑triple triple紀錄,連續三屆奪得一百米、二百米、四乘一百米接力金牌,非常人所能及;英國跑手Farah有double double,連續兩屆奪得5000米及10000米金牌,係歷史上第二人,被BBC評述員視為英國國寶……
美國稱霸奧運,一啲都唔奇,人人都預咗,美國嘅體育扎根在學校,莫講四大球賽(美式足球、籃球、棒球、冰上曲棍球)啲球星,連游泳、田徑、體操等等都係由小學至中學中學至大學,有連續性,貫徹性嘅不同階段比賽培訓出來嘅,銀紙就由商業贊助及私人捐款、家庭支持而來,與中國嘅國家統一培育訓練唔同。以成績論高低,美國運動代有人材出,美國模式確係比較優越。
中國在里約奧運事前期望高,事後轉低調,金牌數目輸俾美國,冇人會嘈,偏偏以一面金牌之差,26對27,輸俾英國,令英國體育界猛咁歡喜到跳起,中國體育總局有排要檢討。中國金牌來源甚為集中,跳水、舉重、乒乓三大項目已佔16金,佔金牌數目61.5%,而英國27面金牌就來自16個項目,其中單車佔6面,比較分散。中國弱在金牌倉庫項目──游泳與田徑之中,成績麻麻,直情成為大弱點,一日不改善,一日難以逼近美國。好彩,臨尾兩日,諶龍趁馬來西亞李宗偉大戰超級丹之後,以體力取勝,奪得羽毛球男單金牌;神級教練郎平竟可令女排上下一心血拼,爆出冷門,從出局邊緣變成金牌得主,令中國攞番個彩,如果呢兩面金牌冇埋,中國奧運代表團實不知如何政治上交代。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載