› 選擇地區
三藩市
紐約
洛杉磯
其他美國地區
香港 台灣 北美
 
2016年08月27日

零食高檔化 - 左丁山

法新社圖片

報載中環德己立街有藥房租約滿,由名牌朱古力店Godiva取而代之,月租30萬元,比舊租約低咗四成,月租呎價約500元。德己立街在大道中與威靈頓街之間,每日行人多到不得了,以前於是有港式藥房進駐,專做自由行大陸客生意,呢啲藥房專賣中藥、補藥之類,並非西式藥房,本地人買西藥喎,史丹利街就有間幾十年老字號勝利藥房啦,聽講港式藥房嘅毛利率高得驚人,只要有生意,租金唔怕高,但好似現在咁,強國人不再湧來香港,佢地嘅亞洲首選旅行地區似足香港人嘅選擇,就係泰韓日,故此本地港式藥房生意大減,冇晒豪氣咯,退出德己立街一啲都唔奇。
香港人嘅購買習慣就或者有啲奇,貴嘢更受歡迎!根據本港最新統計數字,通脹率係2%,創66個月新低,但沙田陳太反映,出街買餸就一啲都唔覺得低通脹,豬肉牛肉雞肉與海魚,無不加完價又加價,但又非常搶手,所以香港現象奇在愈貴愈有人買。好似朱古力咁,Godiva可以租街舖,月租30萬,你話要賣幾多粒朱古力先至夠俾租?一粒朱古力唔賣番二十、三十蚊都對你唔住,愈貴就愈暢銷啫,唔信就睇吓雪糕市場。左丁山細路哥時,有安樂園雪糕食就歡喜到震,後來識得有大公司雪糕(牛奶公司),讀中學大學嘞,學人食來路雪糕雀巢,出嚟做事有糧出之後幾年,見到有Dreyer's夠高級,點知到了現在,周街都係Haagen-Dazs,去到會所就有Movenpick ,喂喂,牛奶公司及雀巢雪糕去咗邊呀?依家啲細路簡直眼中只有H-D;朱古力又係啫,以前食吉百利果仁朱古力已無以尚之,現在則見Godiva愈開愈多舖,可見香港市場全面高檔化,代表中產階級愈來愈鍾意食靚嘢,價錢總之負擔得起,連La Maison du Chocolat都可以在太子大廈、IFC、圓方開咗三間舖,就略知一二,做低價便宜貨好可能唔夠銷貨量嚟搵夠租金也。
蘋果日報講時代廣場有廿幾間吉舖,當然係反映零售市道差;大商場有條件減租三四成,就可以消除吉舖現象,但小型商場就唔多掂,例如大道中皇九嘅Galleria,啲吉舖已丟空好耐,乏人問津,至於環頭環尾嘅「劏舖」商場更純屬旺市時炒賣貨品,買舖者肯定輸到入肉,有閒錢千祈唔好在呢類商場投資。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載