› 選擇地區
三藩市
紐約
洛杉磯
其他美國地區
香港 台灣 北美
 
2016年09月12日

進軍花旗 - 左丁山

(資料圖片)

月前因南海問題,內地憤青搞「罷吃KFC運動」,以示抵制美帝,當時(7月25日)本欄提及來自內地嘅記者C愛吃肯德基炸雞,笑佢唔愛國,記者C話肯德基遲早會俾中國財團買起,食雞才是愛國之道。
話咁快,KFC中國已開始染紅。9月5日華爾街日報報導,前高盛大中華區主席Fred Hu(胡祖六)與馬雲旗下嘅「螞蟻金融服務集團」組成一間投資公司叫做Primavera Capital,與KFC母公司Yum Brands達成協議,斥資4億6千萬美元,購入4%至6% Yum China,呢間公司就係經營中國KFC業務嘅。此外,呢間Primavera還可買入Yum China嘅認購窩輪,最多佔公司嘅2%股權,以Yum China估值120億至150億美元計算。
KFC於1987年在北京開業,係第一間在中國開業嘅美國快餐店。當年一開市就轟動,曾有人包店在KFC舉行婚宴,轟動一時;29年間,中國肯德基業務竟然增值至過千億港元,可謂發達無限量。想當年,左丁山受公司所命,到北京搵合資對像開設Pizza Hut,1988年簽約,因89年天安門事件,阻延到1991年後先至正式開業,已經唔關左丁山事咯,真真往事如煙。
胡祖六與馬雲合作投資,必有長遠目標,豈會甘心只做被動式小股東,應該還有後着,如某些中國鷹派所言:「美帝謀我之心不死,中美遲早必有一戰」,如果真係會有此一戰,不如先去搶佔美國土地先咯。有一間中國企業叫做Greenland Holding Group與Ping An Trust及其他投資者,最近以1.7億美元向美國土地開發商買入三藩市海灣一幅填海地,預備再投資十億美元,將呢幅地開發為生物科技園區。在三藩市搵新地皮從來不易,美商用咗8年時間平整地盤及取得所有建築批准許可,總成本約8千4百萬美元,轉手賺一倍,大概好滿足咯。地盤面積二百三十萬平方呎,用香港方式計價,呎價(成本價)係578港元,抵到爛啦,中國公司豈會放在眼內。呢間Greenland還在洛杉磯建設一座大廈羣Metropolis,價值10億美元,在紐約布魯克林擁有40幾億美元嘅住宅大廈。中美還未打仗,中國人一於用銀紙佔領美國土地,滅美帝威風。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載