› 選擇地區
三藩市
紐約
洛杉磯
其他美國地區
香港 台灣 北美
 
2016年10月15日

憎厭特朗普 - 左丁山

路透社

本欄日前講述基金經理到紐約開會後,回港通知大客戶,特朗普有機會當選美國總統,故此股市有風險,一如英國選民意想不到咁支持脫歐,令環球股市大跌。
政治嘅嘢,一日都嫌長,特朗普言論有自毀性,現在又俾希拉莉拋離嘞。特朗普嘅陳年舊事,竟然在10月7日、10月8日接連俾華盛頓郵報、NBC、CNN翻舊帳,在網上發放特朗普之淫賤說話,現代女性聽了,為之譁然。男人聽了,也覺得特朗普此人粗鄙不堪,故此共和黨領導層紛紛宣佈唔支持佢。老實講,啲有錢有勢力男人鍾意飲酒時吹牛講呢種嘢,並非罕見,但在錄影電視節目之前發噏風,以及接受電台主持人Howard Stern訪問時係咁噏,實在太過份,兼且流露一種跋扈不可一世,恃勢凌人嘅態度,做土豪惡少就由得佢啫,要做美國總統喎,美國知識分子點會頂得佢順?Howard Stern嘅Sirius衛星電台節目,素以粗鄙低俗見稱,每月收訂費,言論不禁,色情粗口出齊,而特朗普願意經常接受佢訪問,對女性評頭品足,連自己個女都講到似流晒口水,點樣做總統,成為美國人典範呀?
美國朋友在10月10日(美國時間10月9日晚上)睇電視辯論,與左丁山用電郵交談,佢話無論美國如何世風日下,道德淪亡,美國之中小學教育嘅中心思想仍然係荷李活電影表現嘅童子軍精神:忠誠老實、不講大話,待人有基本禮貌、着重家庭、伸張正義、扶助不幸之人,試看「超人、蝙蝠俠、美國隊長、奇連伊士活電影」,皆有如此主題貫穿故事之中,若然特朗普選上總統,就係對美國教育精神之大顛覆,故此正派人士特別討厭特朗普。辯論開始之前,霍士電視台皇牌主持奧拉列喺節目中問華盛頓皇牌記者,水門事件嘅Bob Woodward:「點解主流傳媒咁憎恨特朗普,郵報要將佢嘅舊聞放在頭版?」,活禾德年紀已老,答得唔清唔楚,其實美國知識分子對特朗普呢位富二代素來睇唔起,覺得佢憑父蔭上位,為人粗俗不可耐,眼中只有錢與美女,對世界大事無知仲大想頭到要做總統,自不然用盡機會去砌佢,連知識廣博嘅Nicholas Kristof 都在紐約時報(10月10日)專欄用比平時多三倍嘅字數嚟揭露特朗普23年前之性騷擾事件,可見美國知識界恨之入骨。出咗咁多事,如果特朗普仍然可以當選美國總統,我們熟悉嘅世界已不再存在,世界真的改變了!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載