› 選擇地區
三藩市
紐約
洛杉磯
其他美國地區
香港 台灣 北美
 
2016年11月02日

大冷馬胡官 - 左丁山

退休法官胡國興宣佈參加2017年特首選舉,令好多人估唔到。公關界就知先一步,因為左丁山自大阪回港後第二日已聽到呢個消息,胡國興要搵競選公關,大家當然知道係乜嘢一回事。
胡官究竟搵咗邊位,左丁山唔知。胡官雖然話做官唔可以應酬,與社會上好多名人並不認識,但胡家係法律家族,佢大佬係律師,在陸羽飲茶起碼三十年,時時見到,胡官舅仔鄧國楨以前係御用大律師,現在係終審法院法官,在法律界久享盛名;胡官公子係律師,媳婦于文瑛係前熊谷組老闆于鏡波嘅千金,當年于先生嘅頭馬係邊位?咪係大名鼎鼎嘅地鐵主席馬時亨囉。有此背景,故此胡官在宣佈參選記者會上話自己未有班底,固然係事實,但假若佢真的當選為特首,到時振臂一呼,大把中環精英(特別係法律界)願意投身胡營,搵馬時亨做財政司司長都好啱波路啫。
胡官開完招待會,上完電台訪問之後,突然間人氣急升,like不絕口,令左丁山大感意外,真係估唔到佢會講:「年輕五十年也會參加佔中」,「首要之事係推動政改」,「梁振英做得唔好睇,干預司法」,「特首地位並不超然」,嘩,句句頂住人地心口,令啲黃絲帶聽得暢快。餐飲M在陸羽飲茶問左丁山點睇,左丁山隨口話:「賠率二百倍」,餐飲M話差不多啦,胡官說話令黃絲帶高興咯喎,藍絲帶一定唔要佢,而選委會嘅一千二百名成員,以藍絲帶佔起碼四分三以上,胡官參選,點會有機會呀,輸硬,如果有特首普選嘅話,情況就會完全不同,任何一位參選人都有機會擊敗現任特首。
如CY所講,一石激起千重浪,無端端走咗一隻大冷馬出嚟,在前面領放,還未入閘嘅戰馬,點會唔心急呀,真係以為自己係「巴基之星」?葉劉淑儀呢位野心女士已急不及待講明自己有意思參選,其口氣之酸,全港都有眼見,既話「胡官零經驗,財爺hea足十年,CY民望低」,大有捨我其誰之氣概,斯人不出,如蒼生何?葉太唔該你快啲宣佈,你讓唔起新馬胡官二十個馬位㗎!
餐飲M話胡官不計勝負,係要出來搞局,可以有一大收穫,就係在以後幾個月,日日有機會在傳媒曝光,力數CY不是,日日令CY氣頂,玩番個夠本!哈哈,咁又係噃,退休法官批梁,傳媒講一日,特首參選人批梁,傳媒被迫日日報導,胡官不論競選結果如何,都出盡鋒頭,達到批梁目的,令梁特民望不斷被侵蝕。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載