› 選擇地區
三藩市
紐約
洛杉磯
其他美國地區
香港 台灣 北美
 
2016年11月08日

美國決鬥日 - 左丁山

美國總統大選選情峰迴路轉,本來希拉莉一直帶頭,最多領先十二個百分點,以為可以輕鬆擊敗特朗普,半個月前美國CNN已有報導希拉莉已着手組織白宮幕僚人選,初步接觸一啲民主黨人做內閣部長,點知以為坐定粒六入主白宮之際,11日前聯邦調查局(FBI)竟然擲下一個政治手榴彈,宣佈重新調查希拉莉之「電郵門」,於是形勢大逆轉,特朗普嘅民意支持度突然急升,追貼希拉莉,今日(美國時間)係美國投票日,全世界都關心狼與狐狸邊個可以得勝。
我地關心美國大選,與荷包有關,韓國女總統朴槿惠同樣有機密電郵、文件洩漏醜聞,但關我地乜事吖,咪當睇韓國宮闈勾心鬥角肥皂劇囉。美國就唔同呀,政治及經濟影響力無遠弗屆,我地雖冇權投票,但有美國人民同樣嘅焦慮。
選舉前獅子王安排一餐Sevva午飯,介紹三位對地產有深厚經驗及掌握大量地產投資資料嘅朋友俾左丁山認識,其中博士T就話美國大選好可能選出特朗普,其他人驚,佢就鍾意,因為佢認為一個大男人主義嘅地產佬可能做事夠實際,推動美國經濟,比希拉莉呢位政壇老棍更有魄力;我地就引述美國專家分析,擔心特朗普會令美國股市產生更大波幅,禍及亞洲。
會唔會影響埋香港樓市呢?地產R原來係互聯網服務供應商,平日接觸大量數據,可做Big Data分析,先人一步。地產R話:希拉莉上台就一切如常,股市已經反映咗,特朗普上台會好似英國脫歐咁,令股市大跌,但亦因此可能會迫使耶倫在12月唔敢加息,利率維持不變,於是股市可以反彈。如果真係唔加息,香港人供樓負擔唔會增加,買樓熱潮不會降溫,樓價照升,即係話,無論邊個當選都好,樓市都照升。真係咁鬼好景?地產R話:「我嘅分析不含政治判斷,純睇數據,互聯網數字清楚顯示,睇樓人士,今年開始上揚,近幾個月條曲線不斷向上,我嘅數據庫預測本港睇樓人士數字會繼續上升至起碼2017年3月,意味住潛在買樓需求都幾大,我預測樓價起碼上升至明年3月。」之後又點,跌番落嚟呀?地產R認為未必,還要睇未來幾個月收集到嘅互聯網數據先至可以進一步判斷。講得幾樂觀,唔駛驚噃,當美國大選係一場Brexit投票便是。資深地產及投資主編L直情認為,特朗普一旦勝出,股市又跌嘅話,就係入市撈貨之時,今日美國大選,極有可能重演1999年小布殊選票總數輸但贏咗選舉人票嘅歷史,希拉莉險勝,民主共和兩黨大打選舉官司,令到股市有一段不穩定時期。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載