› 選擇地區
三藩市
紐約
洛杉磯
其他美國地區
香港 台灣 北美
 
2016年11月09日

釋法.辣招.大選 - 左丁山

近來時事局勢瞬息萬變,影響股市樓市與政治嘅新鮮事物,層出不窮。好似呢幾日咁,本欄星期日、星期一講樓市,星期二講美國大選及樓市,都係上星期末段交稿嘅,點知一交完稿不久,特區政府就宣佈打殘樓市新辣招,以及美國FBI在香港時間星期一凌晨宣佈希拉莉之電郵不含刑事檢控成份。如此一來,左丁山文字見報之時,有啲out out地,好彩out唔晒,例如星期一本欄指出,特區政府大力干預樓市,已扭曲市場行為,變相鼓勵買樓人士爭相提前入市,以免執輸行頭,慘過敗家,譬如11月4日星期五買樓收租與11月5日先至買,就有好大嘅稅款差別。在星期六,本來預測股市在星期一會大跌嘅,點知FBI一發聲明,杜瓊斯指數期貨價在亞洲一開市就升咗二百點以上,帶引香港恒生指數上升,雖則地產股跌得慘烈,十大地產股市值蒸發近一千億元,不少人揸地產股由希望止賺變咗擒擒青止蝕,對梁振英無不念念有辭。
好嘞,今朝美國大選投票會有結果,午飯時間已知誰勝誰負,執筆時當然睇好希拉莉,假如跌眼鏡的話,特朗普入主白宮將會震散世界股市。假設希拉莉贏,佢一定會蕭規曹隨,美國政策只有微調,不會大變,投資者唔會擔心。香港市就有兩個問題,第一係15%物業印花稅及第二係人大釋法。人大先下手為強,在高等法院未判案之前,先訂下解釋框框,令本港必須跟從,旨在趕梁游兩人出立法會及以後不准類似港獨人士參選,講吓都唔得,咁樣釋法,當然係不尊重本港司法制度,係一種政治行為,大石砸死蟹,香港人現實啲講,實在無可奈何,骨一聲又要吞落肚。
人大釋法對股市樓市,短期來講,影響中性,長期嚟講,又會點樣?一位具備律師資格嘅地產商對左丁山講:「我經常穿梭香港北京,對內地了解可能比你左丁山多啲,我認為中央幾驚『獨立』呢回事,正要處理、嚴打藏獨疆獨、台獨之時,無端端又聽見有港獨,老大不高興,將來必定有兩手政策,一手係嚴打狠批,聲色俱厲咁鬧,另一手係在背後繼續不斷,甚至加強來港投資擴大經濟控制力及影響力,順便可以加派人員來港工作,等佢呢類人員成為香港永久居民,可以投票。呢班人來港居住之後,對樓價有支持作用,印花稅15%係相當辣,會嚴重打擊本港投資者,但一至兩年之後,地產又係一條好漢!」或者佢有地產立場,講得相對樂觀,但又不無道理,總之放長雙眼睇啦。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載