› 選擇地區
三藩市
紐約
洛杉磯
其他美國地區
香港 台灣 北美
 
2016年12月04日

台北行(三) - 左丁山

鼎泰豐網頁圖片(互聯網)

左太嘅幼稚園同學Y女士帶我地到台北南京東路四段61號點水樓食小籠包,此店在2005年9月啟業,隸屬大集團「南僑」。南僑關係企業會會長陳飛龍聽講係台灣著名美食家,「非等閒經營者能望其項背」。
宣傳就係咁講,食肆日日打開門,歡迎踢館,啲食物得唔得,好容易分得出嘅啫。呢日首先食點水樓名點「翡翠小籠包」,咦,好一般啫噃,再試一客傳統豬肉小籠包,一咬落去,完全唔係永康街鼎泰豐小籠包嘅水平,比較上皮厚啲,汁少啲,肉味淡啲,雖然都唔錯,但頂多係香港上海總會水平,點解會在「全台人氣小籠包評比大PK」中砌低鼎泰豐,得到第一名呢?諗極唔明。評比還評比,永康街鼎泰豐門口永遠有人龍,左丁山就相信用銀紙投票嘅結果嘞。當然,鼎泰豐有大把分店,左丁山試過新宿高島屋、曼谷Zen、香港銅鑼灣、上海虹橋,坦白講,除咗永康街鼎泰豐之外,其他都唔值得在門口排隊苦等。
點水樓本來都算OK,但宣傳得如此巴閉,期望落空,未免失望一啲。食後同學Y話附近八德路有一個巨型商場叫做京華城,有一層(五樓)專賣兒童衣服、玩具、用品,叫左太去睇吓;於是坐的士過去,好快就到,舉頭一望,呢座京華城大得驚人,佔地甚廣,商場外有空地開為小公園,好啱本區居民用。
商場外壁有資料顯示,「京華城全生活廣場」於2011年11月23日開幕,樓面面積21萬平方米(220萬平方呎有多,香港ifc只有80萬平方呎)。如此龐大商場,座落於平民住宅區,附近不見酒店,少見商廈,亦不近地鐵站,點樣吸引人流呢?果然,行到入去,地下嘅化裝品櫃枱(如佳麗寶,資生堂)只見靚女化裝師,客人一個都不見,左丁山唔睇兒童用品,走上六七樓逛逛,除售貨員你眼望我眼之外,就只有一個閒人左丁山,嘩,場面如此淒清,點捱呀。台灣發展商之投資眼光,實在別出一格,不知如何收回成本。同學Y話開幕之時,適逢大陸客湧到,京華城都旺過一陣嘅,現在每天還有幾架旅遊巴接陸客旅行團來此吃午飯。咁講法,唔怪得報紙報導不少台商埋怨蔡英文倒米,怨聲四起啦。台灣民意基金會(親綠營)公布蔡英文民望在11月下跌到26%,比5月20日上任時之65%,大跌39個百分點,跌速之快,令人吃驚,再跌下去,再加一啲南韓式醜聞嘅話,蔡英文容乜易變成朴槿惠第二,要提早落台?蔡英文如果要政績蓋過馬英九嘅話,兩岸關係姑且不論,在經濟方面,確實要拿出一套辦法來振興市場至得。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載