› 選擇地區
三藩市
紐約
洛杉磯
其他美國地區
香港 台灣 北美
 
2016年12月17日

天威難測 - 左丁山

選委會選舉,泛民主派表現令人驚異,竟然可以在社福、IT、高等教育、教育、法律、會計界別,建築測量、醫護、工程等專業界別大勝,充份顯示年輕專業人士嘅投票取向係不滿操控,爭取民主。記者小G問過一位建築測量界選民(大約四十歲),梁特首係測量師,搏命搶地建屋,明益你地噃,做乜啲建制派大敗?呢位選民答得妙:「明益我地啲老闆及seniors啫,五十幾六十歲嗰啲前輩有地位得益最多,我地較年輕一輩,得唔到幾多好處㗎。」呢個界別嘅一位落選人物,有啲名氣,WhatsApp過嚟:「意想不到,暗自垂淚。」
睇嚟,每一個專業界別都有不滿或其他怨氣,經理級打倒「拍拿」級前輩,一於vote them out(梁振英講過㗎),到咗2020年立法會選舉,所有專業功能組別都可能由年輕民主派搶晒議席。建築測量界議員姚松炎遭政府司法覆核議員資格,假如今日補選,謝偉銓承認,姚松炎或其同路人仍然可以取勝,可能贏得更輕鬆㖭。單係呢樣,梁振英已值得俾習核心炒魷,佢搞「專業聯盟」起家,以專業界領袖自居,點知今天會被知識密集嘅行業──專業界選民唾棄,係當初萬萬想不到嘅。
前日左丁山晚飯時與一位商界選委見面,佢同西環冇乜聯絡,唔知西環有乜想法,佢自己就傾向支持曾俊華(如果參選的話),左丁山問佢會唔會聽到吹雞就轉投林鄭(假如參選的話),佢答:「又要劉延東到深圳見我哋,指示投票?唔好喇啩,試過上次轉投梁振英,商界好傷呀!」選委有一位朋友在不久之前,仲應召到西環聽取指示,得悉要全力保梁撐梁,點知一星期後梁振英就宣佈棄選,令佢地覺得好突然,猜測係12月6日至7日兩日間48小時內有大變,北京決定要換人;碰啱梁小姐入咗威院精神科留醫,以家庭理由為下台階正是啱啱好,但選委就覺得中南海天威難測,未到最後關頭,都唔知習核心開邊瓣。經此一役,選委話:「睇成報可能比聽西環指示更可靠!」選委選舉後,中南海更頭痛,泛民手握327票,建制派有867席,只向一人出示綠燈入閘最穩陣,准兩三隻馬競跑,泛民就掌握否決票,可以講吓價,非中央所願也!葉劉、林鄭、財爺之中,財爺民望最高,夾硬唔比佢出場,好難睇箒,由阿爺喝令,保送林鄭入禮賓府,林鄭都唔得馨香,以後施政維艱,會延續梁特惡運,香港有排捱。不如就讓一男一女在擂台上比拼真功夫喇。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載