蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月02日
馬上成為壹會員

林鄭向中央送禮 - 左丁山

林鄭月娥在聖誕新年期間,上京兩次,首先話係放假探仔,之後就縮短私人假期,再度上京大談故宮文物,其間就宣佈咗一個「保密做到滴水不漏」嘅大項目,就係明年動工,在西九建設一個香港「故宮博物館」,展出向北京故宮借嚟嘅歷代文物古董,話係慶祝香港回歸二十年喎。
點解可以保密?最大原因係搵馬會出錢35億,唔駛向立法會財委會申請撥款或自西九文化管理局嘅緊絀預算中再挖錢,原因之二係中央同意項目,如果諮詢公眾發現反對聲音,會「產生非常尷尬」局面。咁即係話,中央話咗OK,啲香港「刁民」夠膽話唔要嘅話,邊個負責?不如就秘密拍板算了。之所以能夠如此,肯定係政府最高層「盡了最大努力」游說馬會董事局啦,近年特區政府當咗馬會係小金庫;康文署搞甚麼中國文物展覽,每次費用千零二千萬元,總係由馬會贊助,康文署完全冇錢辦展覽嘅咩?我哋標準馬迷,一年捐輸不少,馬會每年繳交博彩稅百億以上,政府猶未夠喉,一味向馬會㩒機,呢次大嗱嗱一㩒就35億,好似幾就手,但如果大家翻閱馬會慈善信託基金賬目,就知道馬會慈善基金唔係有好多個35億嘅咋。
我地馬迷投注,馬會抽佣,所作慈善用途應該係有益於社會最廣泛階層,例如教育、醫療、社會福利志願團體及涉及足球體育(因有足智彩),至於文物保育藝術,理應由特區政府撥款,偶然搵馬會支援就未嘗不可,但如視馬會荷包為康文署大後盾,就錯到離晒譜。呢次一筆過榨取馬會35億元,馬迷相信唔多服氣,呢筆錢本來可以用作教育、醫療、社福嘅嘛!搬故宮博物館出嚟,如大石砸死蟹,好多人不便反對。但此事明顯違反特區政府自己之行事原則,特別係西九建設從第一次諮詢到如今,已經十幾年,用咗諮詢費用冇兩億都有一億幾元,反覆討論無數次先至有規劃大綱藍圖,而今一聲「避免某方面尷尬」,就秘密行事,不招標,火速上馬,不依照已定大綱行事,仲唔係辦事程序「大陸化」、「非港化」?星島日報(12月28日)「大棋盤」,講得幾明白,陳啟宗穿針引綫,董建華從旁出力,間接支持及深化林鄭與故宮嘅關係。商界盛傳陳啟宗對林鄭做特首有期望,現在睇到一啲手影嘞,為了呢個故宮項目,西九管理局有可能成為政治籌碼,管理局嘅董事有冇聲出呀?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載