› 選擇地區
三藩市
紐約
洛杉磯
其他美國地區
香港 台灣 北美
 
2017年01月14日

無用之物 - 左丁山

聽完收藏家C哥之言,覺得幾有道理,自己咁多年來出席過不少講座,論壇,頒獎禮,收埋不少所謂紀念品,加埋以前做金融界時之tombstone,一個櫥櫃擺唔晒,現在終於送入貨倉,有幾年未見過咯,呢大批硬透明膠、錦旗、玻璃及一兩件真水晶物品,將來仔女邊度會接收㗎,相信亦係去咗堆填區。但因為紀念品大多刻上、印上自己名字,當垃圾丟掉,又好似唔係幾好睇,其實係一種負累,諗深一層,講座、論壇等等主辦單位致送紀念品,亦係一種浪費,為世間製造垃圾。
一位賓架朋友以前做銀團貸款(Syndicated Loan)主管,十年八年間積累咗不少tombstone,起碼超過一百件(按:過往行家習慣,每做一個Syn Loan就有貸款協議簽字儀式,最好景時會用萬寶龍墨水筆簽字,簽完就歸簽署人所有,跟住每人獲派一件透明硬膠紀念品,刻上借款人,銀碼,貸款銀行等名字,以作留念)。賓架收tombstone越多,用以驕人,證明自己在市場活躍,專做大刁、猛刁、擺在賓架嘅海景corner office,幾有氣勢㗎。
終有好景不常之日,另一經濟循環殺到,銀行要rightsizing喎,高人工老馬就唔該鬆人,喂,做咗咁多大刁都要走?對唔住,下面有三四個30幾40歲嘅名校MBA有朝氣,有幹勁,隨時可以上位。即使唔係提早離休而係做多幾年到60歲退休,呢大批tombstone唔通拎返屋企擺放在廳房咩,實俾太太講俄文講到冇癮為止!有大書房可以存放呀?弊在睇得多實會激氣兼眼冤,隨時導致精神不平衡,真係好似對住墓石,靜待仔女掃走。
左丁山初嚐Syn Loan滋味時,都一心要追上前輩,累積幾十件tombstone起碼。做做吓,就發覺外資銀行炒人絕不手軟,不會念舊,開始失去熱情,尋求轉行。眨吓眼過咗咁多年,如C哥所言,不如盡早自己處理咗值錢或不值錢嘅收藏物件,以免下一代麻煩,橫掂佢地都唔會重視嘅啦,千祈唔好當得自己好重要!可惜吖,呢啲紀念品、錦旗、tombstone之類,有冇公司肯回收廢物再用呀?只係掉落垃圾桶,好似有啲不負責任。C哥話,認清問題之後,以後拒絕再收紀念品,未去典禮之前,就講定俾主辦單位聽,除非啲紀念品係可以食落肚飲落肚嘅啦!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載