› 選擇地區
三藩市
紐約
洛杉磯
其他美國地區
香港 台灣 北美
 
2017年01月17日

環保難題 - 左丁山

呢幾日香港地區出現霧霾,空氣混濁,沙田陳太在家湊孫,打開露台玻璃門係好自然一回事,點知外間空氣湧入,兩個孫女即時咳起上嚟,陳太諗咗一陣,閂埋露台玻璃門,又覺得好焗啫,20度氣溫下,還要除衫,孫女在廳跑兩跑,滿頭大汗,咁點好呢,開風扇又驚俾孫女撞到有危險,唯有開冷氣加穿毛衣,阿女回來見到,即刻問:「阿媽點解咁唔環保,浪費能源?」
唉吔,想點做呀,此乃污染空氣帶來之現實生活問題,好彩香港不是北京,如果有哮喘病,活在北京,直情想自殺,無怪報紙話大把北方(京津冀)空氣難民南逃,逼爆海南省三亞市,再多啲辦法嘅,直情申請移民美國,甘受美帝國主義荼毒,甘心接受外來勢力之壞影響。
好多人將空氣污染歸咎於過份經濟發展,寧要原野荒涼,不要有車水馬龍之盛嘅新市鎮。現實問題就係,中國在1960年時遠較2016年環保,即使在1980年左丁山到北京,餐廳在晚上8點關門,長安大街空洞無汽車,環境幾清靜呀,但當時中國在世界上講嘢邊度有人聽呀,大陸人有乜資格去倫敦在Harrods掃貨呀,如果中國環保環境還是在1960年以至1980年一樣,習近平可以到瑞士Davos威風八面咩!
真正問題不在於經濟成長是硬道理,而是中國環保法例空具條文,無人尊重或遵守,官員見錢開眼,隻眼開隻眼閉,係人都知。一般廠家生產成本(廣義而言,社會增長成本)如果加上環保規範環保制約條件,總成本一定上升,但如果眾多廠商之中,只有一人偷雞不守環保規範,而不受懲罰嘅話,必然取得競爭性優勢,迫使其他廠商跟風,一齊放棄環保規範,冇道德良心好講,大家要生存吖嘛,故此政府監管必須一視同仁,一有貪腐事件發生,就乜都唔駛講,一於罰款罰得好重。中國官場之集體性貪腐係長期的系統性,雖然中國環保法規比香港嚴厲得多,純屬紙上條文,國企民企有幾多間因觸犯環保法例而受罰呀?
不過講咁多,同時解決污染及保持經濟增長,還是要靠科學,左丁山問過同學C博士,簡單如環保發電,全世界都冇共識,冇協調合作,好難搞;譬如風力發電被視為清潔能源,但風力發電機之核心材料係稀土,稀土靠中國生產,而生產稀土係最污染地球之行為!在加拿大享用風力發電之人民,其實等同破壞環境,要負上責任。咁講法,怪責中國貪稀土發財好吖,還是加拿大人要風電,其實係將快樂建築於稀土國家人民身上?

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載