› 選擇地區
三藩市
紐約
洛杉磯
其他美國地區
香港 台灣 北美
 
2017年01月25日

關吳克儉乜事 - 左丁山

兩位年輕傳媒朋友,行銷A等約吃「年夜飯」,左丁山話晚飯可免則免了,午飯則無妨,傳媒朋友素來聞陸羽之名,她倆因「永遠訂唔到位」,問可否到陸羽飲茶?此則易辦啦,於是此日到陸羽二樓吃白肺湯、雲腿鴿甫、咕嚕肉,叉燒甘露批等等,再加陸羽招牌蓮蓉糭、蛋黃麻蓉包、蛋白杏仁茶等甜點,兩位年輕女士平時喜歡只吃少少,此日顧不得那麼多了,一於「透支」晚飯食量。
行銷A為一子之母,話題離不開兒子讀書,講起功課與學校競爭之激烈及名校之階級性,幾乎流下眼淚,痛罵:「你的中大校友吳克儉冇用㗎,林鄭月娥做特首,唔會用佢㗎嗎?」點知喎,眾人皆假設林鄭月娥得中聯辦大力抬舉(但經一事長一智,梁振英不連任事件反映出中聯辦與中央觀點不一定相同),文匯大公兩份愛國報紙日日以大篇幅讚揚,梁特首,董特首背後為她大力游說拉票,林鄭未入閘已知是一面倒大熱門,怪不得自稱有擔當的港大師姐葉劉淑儀為之垂淚。若曾俊華當選,吳克儉自然執包袱,如林鄭上場,就要睇吳局長有冇保家咯,佢係似唔熟書嘅教育局長,但諗深一層,鬧左丁山為吳克儉呢位中大校友開脫都係咁話,今日之教育問題,是教育改革嘅後果!策劃及執行人主要係梁錦松,程介明,戴希立,李國章,羅范椒芬,孫明揚等前人,再遠啲,力主母語教育及分開英中、中中標籤嘅,係董建華執政時期嘅政策,與港英政府無關,更與吳克儉一啲關係都冇,佢只係食死貓而唔識解畫啫,鬧佢不如鬧老董及其他有關人等。
行銷A為公子讀小學兼猛咁學繪畫、鋼琴、羽毛球等等,旨在儲cert,充實所謂個人portfolio,無非為求升入名校中一而已,係今天著名九龍塘幼稚園、小學生嘅標準行為。左丁山提醒佢皇仁書院經已宣佈中一入學面試唔睇cert,唔駛咁緊張,行銷A嘆一聲:「只得一間皇仁唔睇啫,其他名校冇話唔睇噃。啲中產家長好驚輸在起跑線,住公屋啲家長更驚仔女一張cert都冇,冇法子入到名校考入大學!」唉,自求多福,自己努力啦,制度如此,真係冇乜辦法,唔好話老嘢鍾意想當年,有小學會考,升中試之時,只要考得好,住在深水埗嘅窮小販子弟都可以派入皇仁,現在唔係住在皇仁隔籬就幾難入到去。喂,考小學會考、升中試,操死學生喎!嗱,𠵱家考小三TSA,咪又操死小三學生,而且操得嚟冇回報㖭!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載