› 選擇地區
三藩市
紐約
洛杉磯
其他美國地區
香港 台灣 北美
 
2017年02月07日

選舉論壇嘥口水 - 左丁山

1月27日,唐英年對記者話唔希望今年特首選舉係一場君子之爭,唔好成為2012年競選嘅re-run,呢句說話嗒落有味。五年前呢個時候。唐英年因僭建一事,民望逐漸落後於梁振英,加上(一)不少傳媒捧梁,認為佢夠勤力,識講說話,無桃色醜聞;(二)董建華在背後力捧,習近平還未入主中南海就發出欽定指示,劉延東撲去深圳召見建制派選委訓話要佢地轉軚,一定要棄唐投梁。於是乎,指定特首人選,四大條件之中,即愛國愛港,管治能力,中央信任,港人擁護,梁振英盡得其四,唐英年只有兩項(中央信任,愛國愛港),管治能力方面,被攻擊hea做,港人擁護方面,梁振英明顯領先。
一啲有心人收埋唐英年好多材料,忍而不發,讓他順利做完商務局長,財政司長,政務司長,直到最後問鼎最高職位,先至連環發炮,政敵之忍耐力與快狠準負面攻擊,令唐英年至今感到心寒。政治就是這樣的,今年法國總統競選人之中,熱門菲永被指遠在1998年聘用太太為政治助理,領取薪酬。喂,1998年噃,咁多年都唔提出,依家先至爆?總之政治人物一旦謀求登基大業,就會發覺百箭穿心㗎嘞。
唐英年夠hea,現在又話曾俊華夠hea,林鄭有擔當,夠勤奮,十足係2012年捧梁踩唐嘅翻版,如果有莊曾陳年「醜聞」爆出,就係2012年選舉re-run一次嘞,唐英年係想起2012,有感而發嘅。到目前為止,只有一樣不同,就係莊曾民望高過林鄭,市民與傳媒有2012年經驗,今次唔會咁容易上船,被表面形象呃like咯。之不過中聯辦未駛等到另一位中央大員做劉延東出現於深圳,已拚命捧林鄭,不少建制派選委見風駛隽,向林鄭自動獻身,令林鄭不勞而獲,穩得據講四百票入閘,在此情況下,甚麼特首參選人選舉論壇變成走過場兒戲騷,令人興趣索然。譬如香港金融業志同會於明天2月8日在灣仔溫莎公爵社聯大廈大堂舉行座談/答問會,林鄭(上午九時至九時四十五分),葉劉(十時至十時四十五分),莊曾(十一時至十一時四十五分)已答允出席,會員可以到場湊興,之但係,以前不少屬金融界人士表示傾向支持前財政司司長嘅,但風聞欽點林鄭之後,林鄭忽然大受歡迎,佢出席係咁意講幾句就有金融界選委提名㗎嘞,其他人得個講字,嘥口水兼浪費時間啦。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載