› 選擇地區
三藩市
紐約
洛杉磯
其他美國地區
香港 台灣 北美
 
2017年02月15日

旅發局主席 - 左丁山

新年有不少公司、機構、大學搞傳媒茶聚,飯局,春茗,老總級及前線記者、採主等參加得最多,參加呢啲聚會,志不在吃,最緊要攞料,睇吓有無新聞好做,但即管如此,參加者對食物仍然係有最低要求嘅,好似記者小G咁,就最喜歡到香港會,如有撞期,佢必定揀去香港會嘅茶聚、飯聚,最唔like邊間呢?佢話係「銀行家會」Bankers Club中菜廳,每年去兩三次,佢次次無好感,向左丁山取笑:「乜啲賓架唔識食嘢嘅!」
今年呢啲聚會製造新聞篇幅最多嘅,就係旅發局,主席林建岳,總幹事劉鎮漢及大公關梁美寶三人合作無間,你唱我和,回顧2016,前瞻2017,有意無意間透露若干「未落實」大計,例如爭取舉辦全球電子競技大賽香港站賽事,及「舊城中環」等等,好有新意,於是次日連一啲報紙頭版都搶埋,各報紛紛報導,旅發局大收宣傳之效,又唔駛俾廣告費,你話林建岳佢地幾醒目呢。試比較吓,貿發局亦有傳媒春茗,但次日全港報紙冇乜報導,左丁山只見星島日報八卦消息版有引述貿發局主席羅康瑞(兼林鄭月娥競選辦公室資深顧問)所言,食薯片比較冇益,不如飲奶粉。至於貿發局大計,報導欠奉,若論「飯局春茗」之回報率,旅發局贏貿發局幾十條街。
唔係擦鞋,左丁山參加旅發局新年飯局十幾年,由羅旭瑞至周梁淑怡至田北俊至林建岳四位主席,總係覺得岳少最賣力投入,搞旅發局活動似足睇住自己公司嘅主力生意,出力出創意之餘,還自掏腰包(因為好多時旅發局呢個公營機構唔可以請客超出預算)送埋私家紅酒白酒,利用自己之娛樂界網絡,向港台韓日娛樂界明星打心口,請佢地來港拍旅遊短片,免費為香港宣傳。過往田少都好落力出紅酒請客,但田少並非娛樂界人物,同啲人氣歌星明星冇咁熟,在海外宣傳方面,岳少係佔着數多啲嘅。香港一個小小城市,每年遊客(2016)約有5665萬,多過日本兩倍幾,扣除內地客4278萬,國際遊客有1388萬,而日本一個國家在2016年只係2千萬以上,目標係在2020年超過4千萬(包括中國遊客),相形之下,香港旅遊業實在興旺。林建岳已做咗四年主席,任期餘下兩年,2018年由邊一位接班,幾考驗下一任特首,因為香港旅發局幾難搵地產商、廠家、學者、律師、會計師等人擔任,偏偏岳少生意橫跨地產廠商,娛樂飲食各界,呢個旅發局主席係與佢本人工作經驗及性格簡直係perfect fit!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載