› 選擇地區
三藩市
紐約
洛杉磯
其他美國地區
香港 台灣 北美
 
2017年03月22日

自大上司 - 左丁山

前高官孫明揚在電台講曾俊華與林鄭月娥兩人之工作作風,指林鄭對下屬要求好高,自己又勤力(呢樣我地都知,林鄭競選小冊子有林鄭詩句:夜闌兼人靜/愛周末上班/靜靜的思考/默默的工作/尋求新突破/享受那片刻的寧靜。)一讀就知呢位上司老闆係工作狂啦,老闆愛在周末返工至夜闌人靜嘅話,下屬隨時會在凌晨三時收到佢電郵,難免心裏唔會乜乜聲。商界都有不少呢類上司,背後俾夥計唱到面黃,怕佢多過怕米貴。
莊曾又點呀?孫公話佢比較悠閒,唔會催逼,做佢夥計幾舒服,得人鍾意。李國章又係咁樣對南華早報講噃。阿瑟王話莊曾態度laid-back(放鬆,唔緊張)連帶佢手下嘅局長(點埋名,商務及經濟發展局局長蘇錦樑)都係呢類人,睇吓蘇錦樑幾多甩漏事件就知。既有此惡評,唔怪得CY怒炒曾德成、鄧國威之時,曾經想連曾俊華、蘇錦樑都炒埋。
講到laid-back,美國戰後最放鬆嘅總統係艾森豪威爾及列根,最勤力總統係卡達,最緊張嚴控官員嘅總統係尼克遜,偏偏歷史評論都話前兩者對美國有更大貢獻及功績,尼克遜衰咗埋唔到尾,朝七晚十一嘅卡達競選連任時輸畀朝九晚五嘅列根。CY特首比董特、曾特更勤力更少睡眠時間,但民望最低弄得香港社會最撕裂,勤力好辦事?只係理論啫。
最近睇曼城與李斯特城及巴塞踢波,對管治有另外一份觀察。李斯特城本來就係人手唔錯嘅中型班,上季憑穩守突擊戰術,爆大冷攞咗英超冠軍,今季賣走中場悍將Kante,截擊力已大不如前,偏偏威水領隊雲尼亞里想升呢,要球員改踢巨型班風格,控球傳球滲入,但班球員有的是氣力及爆發力,欠的是盤傳技術與細膩短傳,變成捨長取短,於是連場敗仗,陷入降班漩渦,泰國老闆見勢色不對,立即壯士斷臂炒雲尼亞里魷魚,由副手沙士比亞頂上。副手坐正,只求贏波,唔敢玩高章,立即恢復後防泊巴士戰術,前面靠快速長傳突擊,果然產生奇效,連三屆歐霸盃冠軍西維爾都擊退,可見管治之術,在乎懂得限米煮限飯之道,唔好趕潮流空談改革,要改變人的思維,並非一朝一夕之事。曼城教練哥迪奧拿名滿天下,過往帶領巴塞、拜仁,皆戰績彪炳,以天價酬金執教曼城,還未熟習環境就趕走頭號門將赫特,跟住要球員打巴塞風格,控球在腳,交叉進攻,但曼城冇美斯,冇恩尼斯達,冇沙維,後防速度亦慢,點踢到巴塞、拜仁足球呀?於是咪成績倒退囉。未來香港新特首若自以為好打得,要有為,改變香港傳統管治之道,急於向北京大後台交成績表,就是危機所在!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載