› 選擇地區
三藩市
紐約
洛杉磯
其他美國地區
香港 台灣 北美
 
2017年04月10日

上海菲傭 - 左丁山

HelperLibrary圖片

日本賓架H希望日本可以輸入菲傭以解決照顧老人及初生嬰兒的問題,還在得個講字,中國唔聲唔聲已經開始輸入菲傭了。4月6日大公報有報道話上海已批准輸入菲傭,一位菲律賓女士得到「家政服務」的居留許可,為期一年,係浦東公安分局第一次發出嘅。上海菲傭之僱用條件為:一年合約,月薪無最低標準,目前起薪約為6700港元,高於香港之最低薪酬4210元。於2017年4月5日實現零的突破,僱主係一位劉先生,某生物藥科技股份有限公司總裁。
浦東既然首開其端,沿海地區有咁多富豪、富裕人家,必然紛紛效法,申請輸入菲傭表格逼爆浦東公安局都似,一個上海隨時可以輸入十幾二十萬菲傭,若初期只准京廣深滬四大城市輸入菲傭,用銀彈就可以威懾菲律賓男人啦,唔駛出動飛機大炮便可永保南海主權!
上海菲傭若蔚然成風,香港菲傭唔要求加薪先至奇,否則香港嘅有經驗菲傭紛紛轉戰京滬都似,畢竟要香港家庭支付菲傭上海式人工,6700元一個,並非講吓咁容易,到頭來如日本真的開始輸入菲傭,香港主婦大概要「食自己」返屋企!香港公司僱主慎防面對大量寫字樓職位流失嘅局面。
上述或者講得太早,但移民趨勢,從鄉村移向城市(中國經歷咗近40年),從農業移去工業,從發展中國家移去發達國家,過去一百年從來沒有停止過,合乎人類有意識不斷移動尋找新機會的動態發展。整個過程因種族、文明、文化、性格而發生偶發性、民族性文化衝突,在所難免,但過去一百年得到最大移民利益的還是西方國家,移民湧入帶來新活力、新勞動人口與新市場,美國就係最佳例子,有第一批西歐移民,第二批奴隸式非洲移民,第三波的逃避戰爭政治迫害移民,美國科技及經濟先至可以發展到今日水平,稱雄世界,特朗普上台,大談反移民,嚴限移民,只會係歷史長河的反覆,特朗普完全無力阻止美國吸收移民的大趨勢。反之,日本一直抗拒移民進入,以保持純潔民族性,拒絕移民融化,結果就是失去活力,老人大增,年青人數目減少,全國人口絕對數目按年遞減,如不救亡,日本將於若干年後自動消失。如果你係日本天皇,你要嘅係美國式增長還是日本式自然消逝,直至民族滅亡?菲傭係小事,但容許菲傭入境工作,就係一件家國大事,對國家發展有好大意義!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載