蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年06月07日
馬上成為壹會員

美國巨企反總統 - 左丁山

法新社

特朗普親自宣佈美國退出「巴黎協定」Paris Accord,引來全球一片責罵之聲。環球輿論除咗梅鐸旗下報紙及電視台之外,無一為佢辯護。特朗普口口聲聲話退出巴黎協定係本着美國優先原則,保護美國公民,保護美國企業利益,點知第一批人公然反對,與特朗普唱對台嘅,就係美國企業!特朗普由商人變為總統,算係一個重商主義者(經濟學上之重商主義即傾向貿易保護主義),今年一月上任之時,第一件事就係叫齊所有大企業CEO到白宮與佢見面,又邀請好多巨企CEO加入一個總統諮詢委員會,以示佢以美國商業利益為優先,推動經濟增長,促進全民就業,實現競選諾言。
咁親商嘅總統,美國歷史上甚為罕見,更何況最重要嘅內閣職位國務卿由埃克森美孚CEO帝勒森上任,商務部長由八十歲億萬富豪羅斯執掌,權傾華爾街嘅財政部長就係投資基金大亨、前高盛要員萬樂錢,白宮首席經濟顧問係前高盛第二把手鄺加利,呢批人梗係親商多過親民嘅啦。
特朗普話保護美國經濟及企業利益而退出巴黎協定,竟然即時面對商界群起反抗,令特朗普冇晒面。Tesla總裁孟斯克,迪士尼總裁埃加即時宣佈退出總統諮詢委員會以示抗議,高盛主席總裁第一次發twitter對特朗普決定表示極失望,埃克森美孚與雪弗朗石油發聲明,懇請特朗普不要退出,蜆殼石油聲明大力支持巴黎協定;fb創辦人朱克伯格表明全力支持再生能源,谷哥總裁表示失望,蘋果總裁庫克親自打電話俾特朗普,請佢重新考慮,加加埋埋,25間巨企聯合刊登廣告表達支持巴黎協定,計有杜邦化工、通用電氣、英特爾、eBay、希爾頓、蒂芬尼等等不同石油、電力、工程、高科技、化妝品及食品公司,包羅各大行業。
美國勝在有民主制度保護言論自由,商界巨賈可以公然與大權在握嘅總統對着幹,令總統知道佢口口聲聲話為了企業退出巴黎協定,但商界一齊話佢儍。換在中國,習近平講聲,王健林、馬雲、馬化騰等富豪仲唔趕快讚好,話要加強學習習近平講話乎!有一位任先生敢在微博表示對習政策有些微異議,就立即被封殺啦。美國之可畏,不在於佢嘅軍事力量,而在於一位極惡死親商嘅總統可以在重大國家政策上,受到幾乎所有大商家群起反對。此事證明美國企業搵銀,唔駛擦領導人鞋,唔怕與領導人頂撞,一於有話直講,呢種作風係美國可以持續(sustain)強大嘅要素。北京啲智庫拼命研究美國,如果不明白此一點,就係浪費精力、時間。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載