› 選擇地區
三藩市
紐約
洛杉磯
其他美國地區
香港 台灣 北美
 
2017年06月08日

手遊市場方興未艾 - 左丁山

互聯網

肥仔K係千禧代人物,據講(有不少社會調查)呢代人不分西方東方,都唔多喜歡為大公司打一世工,都喜歡自由流動,鍾意做無束縛性嘅兼職,同時做三四份兼職都冇所謂,總之時間配合得到就掂。做幾份兼職其實總工時加起上嚟都幾長,有時禮拜六日都要在家對住副電腦或手機開工,相當困身嘅,不過千禧代樂此不疲,不覺辛苦,反之,叫佢地每星期五日返朝8晚7,就叫苦連天,如果要佢地星期六返埋工,分分鐘辭職不幹㖭。
肥仔K就係做緊三四份兼職,呢個星期飛咗去東京參加東京玩具展,做朋友開辦嘅初創智能卡公司嘅兼職日本顧問,希望開拓日本聯絡網、打開市場,問佢啲智能卡係乜冬冬,佢話:「講你都唔明嘅嘞,現在世界進入手遊電競年代,家用智能卡有不同用途,可供遊戲、玩具之用,將日本手機遊戲軟件開發與中國龐大手遊市場連接得到嘅話,朋友間初創公司好快就可以IPO。」
道理就容易明白,實踐就困難多多,初創公司執笠關門嘅例子,多如恆河沙數,但一個唔覺意成功咗,話咁快就成為億萬富翁。大公報(6月2日)報導,全球每年有超過55萬隻新遊戲上架,每日便有多過1500隻新遊戲上Google Play,成功打入大市場嘅當然係少數啦。去年9月,左丁山請崇基IT尖子Stephen Po到校友會講AR/VR與遊戲、手機。Stephen話騰訊本質上係手遊公司,網上遊戲收入對騰訊愈來愈重要。當時醒目啲就好啦,買騰訊股票就掂晒,可惜識聽唔識做,錯失良機。騰訊開發嘅「王者榮耀」上線後首年已吸金20億人民幣,今年第一季,騰訊之網上遊戲收入大增34%。
正因為中國市場咁大,已成為全球遊戲最大國,產業規模在2017年可能超過2000億元人民幣(2016年全球遊戲市場收入估計係1011億美元),且增長勢頭強勁,試想像印度人口比起中國,有多冇少,中國因一孩政策逐漸進入人口老化期,但印度人口年齡中位數只係27.6歲,有45%人口嘅年齡在24歲以下,直情係標準玩遊手機人士嘅年齡,故此世界手遊市場,還有一輪高速增長期。
肥仔K係玩任天堂超級馬里奧第一代人,自細沉迷打機,如果讀書有咁勤力,寫兩篇博士論文都得,偏偏鍾意打機,更料不到因為打機而學日文,依家居然可以做有償顧問,唔怪得佢話左丁山呢代已與世界新經濟脫節。佢趁去東京玩具展,乘機去埋睇安田紀念大賽,賽前傳來貼士話買杜滿萊及李慕華之「彎刀赤駿」及「明媚島」夠穩陣,明媚島在香港成為大熱門,左丁山於是以兩雙馬為雙膽拖六隻冷腳,點知前者6號跑第三,後者15號就大熱倒灶,唔知去咗邊,冷腳就跑晒出嚟,慘也。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載