› 選擇地區
三藩市
紐約
洛杉磯
其他美國地區
香港 台灣 北美
 
2017年08月20日

英超夠刺激 - 左丁山

LCFC.com圖片(互聯網)

英國超級足球聯賽上星期五(英國時間8月11日)開鑼,由阿仙奴主場對李斯特城,因客勝有6.1倍賠率,左丁山認為李斯特城有能力偷雞,於是先買70元客勝,再買30元主客和,凌晨二時四十五分起床睇波,去到第82分鐘都諗住會有錢贏,當時李斯特城以3比2領先,阿仙奴最多只會在餘下時間逼和嘅啫。唉,點知到咗第84分鐘,阿仙奴竟反勝4比3,場波好好睇呀,係近年難得嘅緊張刺激賽事,唔怪得名將舒利亞話,英超球隊在歐聯爭霸,實力有所不足,但計埋球賽爭持激烈,球場氣氛與球員由頭拼搏到尾嘅精神,英超係全世界最佳足球娛樂。不過一下注賭波嘅話,球迷就會失去中立性,好似呢場波咁,左丁山由贏變輸,早上五點前再上床瞓覺,幾乎瞓唔着。
睇完第一周賽事,英國球壇一致認為今屆冠軍係兩曼之爭,曼城與曼聯是但一隊攞冠軍。阿仙奴仍然係橫傳短傳過多,有攻勢,缺入球效率,後防依然不穩;利物浦對屈福特,臨天光俾對方逼和,暴露後防不能集中精神嘅大缺點,依然故我,毫無改善,最好波嘅古天奴差不多篤定離隊,中場進攻能量大受影響,今季只能爭前四名,冠軍肯定無望;熱刺人腳合作無間,新人輩出,但雙曼大肆增兵之際,熱刺無新球星加入,始終蝕底,頂多爭三四名,車路士班主突然縮水,賣走馬迪治,趕走哥斯達,送走大批青年軍後備,新簽球星傷患未癒,主力球員柏度,祁曉與法比加斯竟然一齊攞晒紅牌停賽,夏薩特受傷未有復出時間,正一落筆打三更,睇怕上屆運氣已經用完,今季諸事不吉了,車仔班底雖厚,但人手不足,攞到第三名算教練干地有天才,第一場就輸俾般尼,凶兆也。
至於兩曼,曼城後防大換血,前中場加強人手,第一場贏白禮頓2比0,表現對辦,如果今屆後防新人有出色表現,加上隊長甘賓尼身體能夠支持全季賽事嘅話,可講係坐亞望冠,唯一對手係曼聯,摩連奴今屆行運,買球員得心應手,首先係搶贏車仔,得到新杜奧巴,即係盧卡古加盟為中鋒,繼而無端端發達,車仔竟然讓馬迪治轉會,干地氣頂到冇聲出,而摩連奴掩住嘴笑,以四千萬鎊買入防守中場大將,讓普奧巴放心上前助攻,讓後防四將有一道可靠屏障,於是全隊生晒,攻守呵成一氣,英超誰與爭鋒?上述六隊明顯高出其餘球隊一皮,但並非一帆風順嘅,英超會隨時爆冷㗎。

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載