› 選擇地區
三藩市
紐約
洛杉磯
其他美國地區
香港 台灣 北美
 
2017年08月24日

彭定康來港 - 左丁山

8月19日金融時報發表一篇讀者來函,標題係HK government has made a deplorable decision,好吸引眼球,左丁山冇法子唔讀一讀,來函作者嘅署名竟然係Lord Patten of Barnes, Governor of Hong Kong, 1992-97,當然就係彭定康(肥彭啦)。
肥彭有乜嘢講?咪就係指責香港特區政府犯下嚴重錯誤,由律政司司長決定上訴要推翻黃之鋒、周永康及羅冠聰之輕判(社會服務令)囉。肥彭聲稱當逼害呢三名年輕人嘅人物被掃入歷史垃圾桶,被人遺忘之後,黃周羅三人名字還會永久流傳!
肥彭語氣甚重,似乎動了真氣,但人走了就茶涼了,佢當年之得力助手如曾蔭權、曾俊華、許仕仁、陳方安生等等等已走入歷史。當時未有資格與佢討論大事嘅林鄭月娥先至係今日香港揸弗人,故此肥彭即使多為黃周羅講說話,特區政府點會睬佢吖。
最近行英文書局,見到有本新書出售,就係彭定康寫嘅First Confession: A sort of Memoir,聽講在辰衝幾暢銷。呢本書算係肥彭嘅自傳,從佢自牛津大學畢業後,走咗去紐約闖蕩,誤打誤撞,成為競選紐約市長John Lindsay(1921-2000)(任市長年期1959-1965)嘅競選團成員,於是肥彭話:「politics find me」返回倫敦後就加入保守黨,展開一生政治生涯。
呢本書好唔好睇?得左丁山有時間讀完本書先至夠膽講。美國商會及香港總商會嘅會員朋友就有電話通知,話彭定康會來香港推廣本新書,已收到資訊,9月21日會有美國商會早餐會,請肥彭出席;9月20日下午四點半香港總商會舉行講座請肥彭主講。香港大學方面又有消息話9月21日黃昏在陸祐堂有通識講座,肥彭與港大師生討論本書,不過到時分分鐘變成時事論壇啦,港大學生會更加有興趣講吓周永康同學啩!至於仲有冇其他演講及活動,左丁山未知,相信出版商企鵝必然有指定動作,例如安排佢出席書局簽名活動,與買書人影相,簽名諸如此類嘅。呢個時候肥彭來港,特區政府與中聯辦必然冷面相待,睬佢都嫌嘥氣,但普通香港人對佢又幾有感情㖭,相信本新書在本地有一定銷路,如果肥彭出席公開活動時,有大把市民到場嘅話,有啲人可能覺得尷尬㖭!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載