› 選擇地區
三藩市
紐約
洛杉磯
其他美國地區
香港 台灣 北美
 
2017年09月29日

齊吃日本 - 左丁山

左丁山有一次見到中華總商會會長蔡冠深,傾起偈嚟,佢口若懸河,滔滔不絕,說話能力一流。佢父親蔡繼有創辦嘅新華集團,以經營海產起家,現有海產大王之稱,在東南亞各國都有投資,上次印尼總統維多多訪問香港,百忙之中親自帶隊到中華總商會拜訪,可見蔡冠深之印尼關係好掂。蔡會長一人同時係香港日本經濟委員會主席,香港韓國商會創會會長,香港越南商會創會會長,中國香港以色列民間科技合作及促進中心主席,蔡家又捐款支持保良局蔡繼有學校,俗語有云「瓣瓣掂」,可能就係蔡冠深最佳寫照。
上星期有報導話日本頒發一份「外務大臣表彰書」俾蔡冠深,當然係表揚佢在港日貿易方面嘅貢獻。日本方面講,香港取代美國成為日本海產最大海外市場,佔總出口25%之多。呢項資料,確係相當驚人,小小香港,人口730萬,竟然係日本海產最大海外市場,真係講都唔信,可見香港人對日本十分鍾情,不只成為旅行日本痴,兼且成為日本食物痴。近幾年內地網上不停翻炒日本海產受福島核洩漏之污染,美國FDA禁止入境,諸如此類嘅唱衰日本海產舊聞,但香港人一於唔信、唔理,照樣肆無忌憚咁將日本食物放入肚。
地產F請吃午飯,在港灣道一號請食靚嘢,大家飽到唔識郁,地產F話:「我係好鍾意食,久唔久就去巡超市。奇怪嘅係,幾間高檔超市之中,銅鑼灣Sogo,IFC嘅city'super有好多日本食物,兩處都其門如市,但其他甲級商場嘅高檔超市,以賣歐洲食物為主,我就俾錢唔駛排隊。點解呢幾間唔識轉膊,賣多啲日本貨呢?」財務W話:「我知。人地用歐洲人、澳洲人做總經理,咪專賣歐洲澳洲食品囉!」我都知,但超市總要關注市場動向,知香港人消費習慣及偏好先至係最重要,日本貨當道,澳洲貨靜一靜之時,仲唔去source日本貨?歐洲籍、澳洲籍總經理點解咁唔曉變通?香港老人家對日本佔領香港三年零八個月,還是難以懷忘,左丁山曾經向一位老馬主提議試吓買日本馬玩吓,佢一聽就嬲,點都要買澳紐馬,果然幾有性格,但佢的仔女就每年去日本賞櫻,賞楓葉,懶理老頭子之言。日本軟實力確有威力、磁力,年青人崇愛日本,在學校唱幾百次「前進、前進」都冇用!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載