› 選擇地區
三藩市
紐約
洛杉磯
其他美國地區
香港 台灣 北美
 
2017年10月27日

閱文上市 - 左丁山

中午飯局來了一位不速之客,就是新進投資經理校友Y,投資Y係21世紀畢業生,畢業冇耐就考咗CFA,於是在投資基金界轉工好容易,好多人話CFA幾難考,但左丁山在校友活動中,碰到六七位投資界年輕經理,位位係80後,佢哋都話考CFA資格冇乜難度喎。或者呢班係「有偏見樣本」,香港啲讀書叻仔叻女,通常考國際認可嘅專業資格試,都係過五關斬六將,直搗黃龍嘅。
投資Y點解走咗嚟食飯呢?佢話一早登記咗出席「閱文」招股發佈演述會,當日午飯時間在金鐘萬豪酒店舉行,點知因為當日個股市有啲郁動,佢掛住睇住電腦,一時忘記提早出門,後來匆匆趕到萬豪,演述會還未夠鐘開始,但萬豪酒店第5第6號房(閱文訂咗十五圍)已塞到爆,記者又多,佢入到去,只有企位,仲要企到最後排,幾難全神貫注台上人物演講,於是索性走返嚟中環參加我哋嘅飯局。
閱文乃騰訊一間子公司,成立於2015年3月,旗下有不少中文小說、文學、奇趣網站,英文名就正正是China Literature,據稱有活躍用戶一千五百萬,五百餘萬作者,每年發出稿酬十億元人民幣,累計月銷過萬嘅作家有700位以上,香港作家唔知有冇分到一杯羹呢?左丁山呢類老派,未上過閱文網站,投資Y就話:「師兄,作家有個發達平台喎,你唔好用廣東話寫稿,用多啲底氣、牢牢、爭取勝利、奪取、人民當家作主呢啲文字,你有希望㗎!」
係!或者用廣東話在閱文旗下網站發表短篇小說評論都有讀者嘅呢?廣東廣西有上億人用廣東話㗎?
追數王話:「你唔使發夢,19大後,中國共產黨會加強控制網上言論、文字及語言,網站用廣東話發表一啲中共唔鍾意嘅文字,一定嚴禁,邊個作家在閱文發表主題不正確小說,實會被刪除!」咁又係,香港作家如無中共底氣都無謂發夢了,不如索性等閱文IPO之後,睇清楚形勢買股票收埋喺夾萬可也。習近平新書有講:「過不了互聯網這一關,就過不了長期執政這一關,宣傳思想工作戰線上的同志,要當戰士,不當紳士,不做騎牆派和看風派,不能搞愛惜羽毛那一套。」講得咁清楚,大家邊可能仲有幻想!閱文網只能在中宣部牛咁眼睇住下生存,當作股票炒一轉咪算囉!

左丁山

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載